細數4個香港街頭表演場地

街頭係香港 busker 展示音樂才華嘅獨特平台，普羅大眾不但可以自由、開放嘅方式展示自己嘅音樂，仲可以近距離同觀眾互動，豐富城市文化、啟發創意。近年來，香港嘅街頭表演文化蓬勃發展，但係可以俾 busker 表演嘅地方越來越少。不過其實除咗普通街頭表演之外，香港仲有其他地方可以俾大家合法 busking 嘅。小編今日就參考左 Recoroad 上面嘅文章，係本文簡述香港各種多樣化嘅街頭表演場地，等大家想去 busking 有時候都多個選擇！

康樂及文化事務署係沙田大會堂廣場推行「開放舞台」計劃，提供免費場地同時段，通過試演嘅表演者可以係戶外展示才華，將藝術融入社區。表演時段會係星期六、日同公眾假期，上晝11點至下晝6點，每節表演時長兩個鐘。街頭表演者可以預約時間，享受免費舞台。呢個計劃為表演者提供展示才華嘅機會，同時豐富社區文化生活，令市民可以係公共場所欣賞到多元嘅藝術表演，共同感受藝術嘅魅力。

地址：香港新界沙田源禾路一號

通常出入沙田大會堂嘅人都係比較鍾意藝術同音樂嘅，所以呢個場地應該會吸引到一班真心中意音樂嘅觀眾！

早前受疫情影響而暫停嘅西九文化區「街頭表演計劃」已經係今年六月恢復接受申請。成功入選嘅街頭表演者將會獲得有效期半年的「街頭表演許可證」，可以預約週末同公眾假期時段係指定區域 busking。呢個計劃除咗為街頭表演者提供展示才華嘅平台，亦為公眾提供與藝術互動嘅機會，令大家可以係假日享受優美海濱環境嘅同時仲可以欣賞精彩嘅街頭表演。

西九文化區嘅人流眾多，而且個 view 真係一流！對住個海 busking 一定非常有feel！

中環街市係2020年完成重建，並係2021年重新對外開放。市區重建局同營辦商係中環街市推行街頭表演計劃，為中環街市帶來更多活力，增強區內互動。不過街頭表演者要申請相關嘅表演通行證，同遵守街頭表演指南，以保持中環街市嘅秩序。

地址：香港中環皇后大道中93號及德輔道中80號

中環街市真係好有文化氣息，而且真係好多時候都有人 busking~

觀塘繞道下嘅「VESSEL發現號」場地由非牟利機構「藝土民間」負責經營，佢哋希望透過藝術、文化、綠色生活同社區參與，推廣藝術文化、發掘才華，同埋培育共享社區價值。從2022年10月開始，場地餐廳就不定期邀請街頭表演者係發現號02場地演唱。而從今年年初開始，街頭表演環節更增加至每週四和週六，以推動街頭表演文化。

地址：觀塘海濱道126、90及86號

除咗Busking之外，觀塘海濱亦都有人踏滑板，VESSEL 發現號夠晒街頭藝術氣氛！

街頭表演有獨特嘅魅力，可以吸引觀眾嘅目光同參與，並為城市注入活力同魅力。除咗以上所講嘅幾個場地之外，其實旺角街頭都可以合法Busking，不過就需要一啲時間通過申請。中意音樂嘅你，今個假日不妨到上述地點支持街頭表演，可能你會有意外收穫！