March 17, 2023

學結他關注組準備學結他嘅你要注意啦!


細數最常見嘅五種結他同學你係邊一種呢?

Twiggy Lau

FUNGUITAR specialist
喜歡自彈自唱
人氣駐唱歌手 / 唱歌老師

前言


有上過結他小組嘅人都會留意到,就算一班人一齊學同一首歌、同一個老師,都會因為每個同學嘅唔同性格,有好多種學習方式同唔同嘅成果。今次就同大家講下學結他嘅5種人!唔知你哋又係邊一種呢?

1. 表演型


表演型嘅結他同學通常自信滿滿,中意比人關注嘅感覺。學咗結他一排,彈好咗第一首歌後,佢哋通常會開始搵唔同嘅機會表演,或者故意係其他人面前練習彈結他。以前學結他嘅時候,我都有遇過表演型嘅結他同學。記得嗰時明明仲有空出來嘅練習房,佢都會特登去我嗰間練。有一次我練習緊嘅時候,佢又過嚟「表演」,「表演」完,先好滿足禁返去自己嘅練習室。雖然當時我都覺得有少少騷擾到我練習,但係我明白咁係因為表演型嘅結他同學為自己嘅興趣感到自豪。表演同受到稱讚會令佢地覺得開心,呢個亦係佢地學習同練習嘅動力~

其實學音樂嘅人有表演慾都係好事嚟嘅!

2. 興趣型


興趣型嘅結他同學通常係在職人士,每日重複朝九晚五嘅翻工 routine 好辛苦、好大壓力,想搵樣興趣放鬆下。所以佢地會抱住得閒練下嘅心態,心情好嘅時候練下結他,冇時間就上堂先算。雖然佢地嘅學習進度未必好快,但因為冇乜壓力,所以通常會好享受學結他嘅過程。其實我都幾欣賞一啲返全職依然會學多種技能嘅人,因為返過全職嘅人,都會知道收工其實已經好攰,冇乜精神再去做其他事,所以冇練禁多其實都係人之常情。每個人都有自己嘅pace,我覺得只要清楚自己嘅目標,然後努力達成就可以了~

不過有時間都係練下結他喇,練習對於學習樂器嚟講好重要㗎 !

3. 自我挑戰型


自我挑戰型嘅結他同學會比較心急,鍾意向高難度挑戰!佢地有明確嘅目標,一個月內要學好邊首邊首歌。好處係,自我挑戰型嘅同學通常一開始嘅進度都比較快,亦因為佢哋對自己嘅要求高,所以如果自律嘅話,比較大機會成為出色嘅結他手。但學習需要時間,目標定得高,就需要相對嘅練習計劃。如果唔夠自律,未學行先學走,可能會令自己好辛苦,最慘係耗盡熱情,最後放棄。

向高難度挑戰通常要練習好耐,隻手好痛都要繼續彈,真係需要好大決心~~

4. 怕醜型


有表演型同學就會有怕醜型同學!怕醜型同學冇乜自信,學咗好耐都唔敢表演,就算彈得唔錯,每次有人叫佢哋彈結他嚟聽,佢哋會用各種藉口去推搪。有部份怕醜型嘅同學比起表演,會更加享受自己彈結他,呢個對佢地黎講係好治癒嘅 me time 時光。但亦有部份同學其實內心係好想表演,好想俾人讚,不過唔敢踏出嗰一步。我自己其實都係比較怕羞嘅,哈哈,所以我都仲好記得第一次喺台上表演嘅感覺,真係好恐怖!雖然為咗嗰次表演練習咗好耐,但我清楚記得嗰次最後都係因為緊張得滯彈錯晒嘅!不過如果冇嘗試過,又點會有機會成為一個出色嘅表演者呢?大家都喺錯誤中學習,所以唔使怕醜嘅,勇敢地犯錯吧!

雖然你哋可能睇唔出,但其實我都好怕羞!

5. 三分鐘熱度型


三分鐘熱度型嘅同學一開始會非常熱衷練習,每日練五至六個鐘,練到手指超痛、手指抽筋,但後來熱情冷卻後,佢地會練得越來越少,又或者因為有咗其他新興趣就慢慢放棄。我自己覺得三分鐘熱度嘅人通常都係因為唔夠鍾意彈結他,咁其實都冇所謂嘅,每個人嘅興趣唔同。但如果學乜嘢都係容易放棄嘅話,就要好好反思下,因為所有嘢其實都係要有付出先有收穫嘅~~

學每一樣新技能都需要時間同耐性,無論係邊一種類型嘅結他同學,都要相信只要努力練習就會有成果!只要有足夠嘅熱情,唔同嘅性格、唔同嘅方法都可以通往成功嘅道路~~

Funguitar 王牌木結他指彈課程立即報名木結他課程
Twiggy Lau

FUNGUITAR specialist
喜歡自彈自唱
人氣駐唱歌手 / 唱歌老師