點樣應付突發情況？有觀眾行過黎當面批評點算好？

之前同大家講過 busking 要準備嘅裝備，但係其實表演者係心理上嘅預備都好重要。嚟到呢一個Busking注意事項嘅下集，翠兒就同大家分享下一啲我去Busking嘅心得喇。

記得我第一次出去 busking 係喺中學嘅時候，當時同一班有夾開嘅 band mates 喺楊屋道街市對出 busking。因為當時有好多個 vocal，所以其實我都只係唱得幾首。當中有個朋友係Busking 經驗特別豐富嘅，我自己唱嘅歌都練習過好多次，所有嘢都好 well prepared，所以都唔係特別緊張。大家記得，如果想表演穩陣啲，第一次出去 busking 都係同一啲比較有經驗嘅人一齊玩會比較好。地點方面亦都可以選擇荃灣、觀塘或者屯門呢啲地方攞啲經驗先，因為旺角同尖沙咀，如果係週末會比較多人。

累積多啲 busking 經驗對真正上台表演好有幫助㗎！

第二，我知道對一啲唔係太多 busking 經驗嘅人來講，啱啱開始Busking 會好緊張，我啱啱開始Busking嘅時候都會緊張。但作為表演黎講，busking 都算輕鬆，因為你可以想唱咩就唱咩，亦都可以隨着心情同樂手一齊做一啲improvisation或者ad lib。所以踏出咗第一步之後，其實並沒有你想像中禁恐怖。街道上人來人往，只要你準備充足，正常發揮，其實唔係太多人會留意你做緊咩，都唔使太緊張。如果你已經有Busking經驗，就要記住，其實一個成功嘅 busking 表演係可以吸引到好多觀眾駐足觀看。以我嘅經驗來講，靜靜地唱自己嘅歌同埋勇敢同觀眾互動嘅Busker 圍觀人數真係可以差得好遠。所以要記住 busking 都係表演，街道係舞台，都要表演嘅態度呀！

每一場表演都100%投入，觀眾一定會感受到你嘅 passion～

第三，你要準備好一個open to 任何意見嘅心態。我自己 busking 就冇遇過一啲行埋黎批評我表演嘅人，多數行得過嚟傾偈，都係欣賞你嘅觀眾。但係喺街頭，咩事都有機會發生，所以記得時刻保持一個謙虛嘅態度，虛心接納任何意見，令每次表現都做得比上一次更好。

好多時觀眾嘅意見可以話到俾你知你忽略咗嘅嘢，謙虛接納同努力改進，就可以一次比一次做得更好！

一班人準備咁多，一齊出去 busking 都係為咗開心，所以以上講咁多關於心態上面嘅預備，其實最重要都係enjoy the stage。喺Busking 嘅時候攞多啲經驗，鍛練吓膽量，到時真係踏上一個舞台，就會係一個全新嘅自己！如果大家對 busking 嘅硬件上面有啲咩唔清楚嘅地方，歡迎大家睇返busking 注意事項裝備篇。我哋下次再見～～