上次講完咩係 Guitar Fingerstyle 之後，發覺原來大家對高效練習法都好有興趣，所以決定嚟緊不定期寫下呢個主題，希望我十幾年嘅教學心得幫到大家。今次我哋探一個好困擾結他新手嘅問題：明明我每日都有練譜，點解仲好似彈來彈去都冇咩進步？

首先要搞清楚，練譜其實係咩一回事。好多同學仔以為練琴，就係將一份啱啱拎到嘅譜由頭彈到尾，重覆又重覆，直到彈得出個大概。覺得自己練咗好耐嘅同時，個進度又好似唔多，彈到前面又彈唔到後面咁。

人其實係一種依賴慣性嘅動物，一旦你開始熟悉某一個動作，到你第二第三次做就會開始搵到捷徑，令你更快適應到新技能。不過喺呢個時侯，操作就會憑直覺，變得無咩意識，簡單黎講：你只係重覆緊一個動作，當學習建基於呢個基礎，就會好脆弱，大家睇過 《誰搬走了我的乳酪》，就會明白盲目嘅安逸感，往往都係最危險。

Funguitar創立咗十幾年，教過嘅學生好多，無論係極新手，定係有自學底子嘅都見唔少，有一種學生往往喺上堂嘅初期表達出一種特質，令我好快知道佢一定比起一般人更快學識。例如叫大家示範彈下Pattern，當其他人彈一次就望住我等comment嗰陣，呢種學生會彈完一次之後，自己嗌聲「哎呀」，唔係三心兩意，唔係自我懷疑，而係察覺到自己彈得唔好嘅地方，然後又彈多一次修正。

呢一種性格特質，就係特強嘅自我意識 (self-awareness)。

唔知大家知唔知，而家好多注重安全嘅新車，都有一個新功能，叫車道偏離警示，或者車道維持 (Lane Assist），即係話當你行車時，車頭有個鏡頭會識別你馬路嘅線，每當感覺到你越行越偏而又唔係過線，就會電腦介入，拉你返黎中間，確保你唔會出意外。之所以講 self-awareness 尤其重要，係因為呢個感覺就好似你腦人面嘅 lane assist 一樣，練習時無時無刻都要留意住自己嘅練習軌跡。

練結他係一件好易令人分心嘅事，點解咁講呢？你試諗下，一份譜你彈十幾次，首歌大約成型了，你會有成功感啦（阿媽都認得你彈緊咩喇 yeah），會有舒壓感啦（夜媽媽，木結他，又係一個好減壓嘅 Combo 黎嘅），簡單黎講，你好快會進入咗一個享受音樂嘅狀態，獎勵 (Rewarding）嘅情緒會帶住你飄咗去第二度。

快啲整番個車道偏離警示先喇！

但大家諗深一層就會發現，其實挫折同迷失，係任何學習過程嘅必經階段，因為初期熟悉感未出現，摸索期嘅心態必然係戰戰競競，非常累人；而人類生存嘅法則之一，就係趨吉避凶，於是乎為咗盡快達到 Rewarding 呢個目的，我哋一係就會過濾咗一啲不適嘅學習障礙，一係就會用另一個差唔多，但係錯嘅方案去取代佢，試圖等自己盡快過關。

千祈唔好為咗達到 Rewarding，就用另一個差唔多但係錯嘅方案去練習呀！

就以一個例子嚟答大家，可能你啱啱接觸三連音，唔小心將佢混淆咗其他拍子嘅讀法，當你唔察覺自己彈錯，幾次後你就會誤判嗰個係三連音。彈錯幾十次後，基本上你已經冇咗對三連音嘅觸覺。然後你仲會覺得，我明明就練咗三四十次啦！點解仲未學識嘅？錯過咗自己最佳嘅黃金學習時機，反而越來越有樽頸嘅感覺。

練習千祈唔好急，最緊要快！

講咗咁耐，到底我吔要點培養 self-awareness 呢？以下我分享兩個我上堂成日教學生嘅方案或例子。

開始之前搵一啲暗示，令自己每練一陣就要記得，自己當前嘅大任務，係建立正確嘅習慣，而唔係急於重覆某個習慣。例如你拍子跟唔上，如果為咗盡快彈得似樣然後上 YouTube 聽下原曲模仿先，而冇消化一下慢慢數一次，到頭來你首歌會彈得似，但對拍子嘅感釁就從來唔會係你身上原生出現。

你可以用螢光筆劃低個重拍，提自己按時踏腳，從而穩定對 BPM (Beat Per Minute)嘅控制，再慢慢拎起支結他都未遲。練琴期間，你甚至可以忽略自己其他不足，例如有少少按得唔好等等，唔好心急，一切以大任務為首選。其實每次可以好有效咁處理好一個小問題，就已經好叻㗎喇！

就用我以下編曲嘅《壞與更壞》為例，最後嗰幾個小節我會建議同學仔咁寫：

你係為咗咩練結他嘅？想自娛？想放輕鬆？無論係咩都好，延遲一下太早出現嘅正面情緒，因為只有咁樣，你先會繼續反覆研究當中嘅不足之處，從而建立自我修復嘅能力。例如第一次啱啱彈到份譜，唔好急於太快收貨，然後想再彈下一首，可以俾自己一啲難度或者關卡，例如係錄住音仲可唔可以一 take 過呢？力度嘅控制仲可唔可以好啲呢？問下你嘅結他老師，睇下自己仲有咩可以再突破。

大概如果要搵一句金句記低，我會話：

有好多隱藏技術嘅正確學習時機，係必須等份譜熟透，自我發掘好幾次先會觸發到。佢絕對唔會喺初期出現，更加唔會喺習慣未成形嘅時候出現。

最怕當你日復日，以為自己好俾心機練琴，原來只係喺度速食份譜原地踏步，而冇好認認真真咁練過結他。延遲你享樂嘅情緒，集中資源自我修正，先可以搵出啱自己嘅練習軌跡。

如果大家有啲咩唔明白，或者想有人督促你，心動不如行動，即刻報名學結他了解更多啦～除此之外，我哋網站上面都有大量樂譜免費收睇，希望大家可以有多啲資源練習～

自我發掘、精益求精先係學習結他最好嘅態度！

同步刊登於 Re:spect Magazine 272 期

首先，好多謝 Jesper 嘅邀請我成為其中一個 Editor，等我可以喺呢度同大家分享一下結他經。講起上黎我都有六七年冇寫過專欄啦，今次有幸同 re:spect 結緣，除咗因為佢嘅信念吸引到我之外，亦係被 Jesper 十五年黎嘅堅持所感動。

畢竟，唔理個環境有幾困難，喺今時今日仍然堅持做支持音樂界嘅紙媒（仲要係免費派發），本身就係一件好值得被尊重嘅一件事。十五年來 Jesper 捱過幾多個難關，先湊得大呢本對樂迷黎講嘅精神食糧？我真係問都唔敢問。

自己搞咗 Funguitar 十幾年，作為免費平台 funguitar.pro 嘅創辦人，不免有啲感觸，至少呢一點火花，燃燒到我了。喺呢度容許我講一句：俾啲掌聲 re:spect，俾啲掌聲 Jesper！希望今次呢一個合作企劃，都可以帶一系列啲實用性嘅內容俾 re:spect 嘅讀者。介紹返，以下係由我今期開始全新連載嘅專欄：Fun Guitar Tips。

除非你刻服到呢個困難，如果唔係你冇得同我支 Bourgeois 鬥….

創立咗 Funguitar 十幾年，見證住香港結他界最大嘅轉變，就係越來越多人開始關注指彈結他（Fingerstyle）。

記得中學嗰陣去學結他，當時初中生普遍嘅心理係學彈唱（Accompany）囉，速成丫嘛（貪佢簡單），又容易同異性交流（學黎媾女啦即係），於是個個買一支魚絲結他（當年鋼線結他尚未係初學者嘅主流），自彈自唱下《對面的女孩看過來》，《單車》，《晴天》等等。彈唱耐咗慢慢就要搵啲挑戰啦，於是就有了 Chord Melody / Chord Solo 嘅出現。

以當時黎講，由木村托哉松隆子加持嘅《戀愛世紀》主題曲 True True 就正正係入門 Chord Solo 必彈之作。

所謂彈唱嘅定義其實比較簡單，就係會將 Chord Progression，以一個比較固定嘅右手 Pattern 一路 Repeat 下去，務求唱歌嗰陣有個穩定舒服嘅氣氛，結果取決於你唱成點。簡單黎講，彈唱嘅結他伴奏就好似舖好一條火車軌，當然舖得出色會加分啦，但最最最重要嘅係：穩。以五月天的《突然好想你》為例：

而 Chord  Melody 就係和弦（Chord）再加上旋律（Melody）同時彈奏，而當我哋拆開一個 Chord，當中會包括咗根音（Root）同埋佢入面嘅組成音（Formation），再彈埋旋律（Melody），由結他代你唱埋，用結他純音樂幫你去勾勒出《突然好想你》嘅神緒：

比起彈唱，Chord Melody 會有兩個 Voicing（根音一個，組成音及旋律係另一個）；另外節奏會更多變複雜，手指移動更密。用比喻黎解釋，就好似一架棍波車，要求車手（結他手）有細膩嘅操作（右手音色感情控制，拍子控制），先可以喺一條山路（Melody）發揮到極致。

而普遍黎講，指彈演奏（Guitar Fingerstyle）其實就係以 Chord Melody 作為基礎，再加入 New Age 嘅技術而成的，包括運用特殊調音（Alternative Tuning），加入以結他作共鳴箱敲擊型嘅技術（Percussion Technique），同埋以拾音器效果器（Pickup & Effects）加強表現。

而 Fingerstylist 亦有分 Composer 或Arranger，前者會創作很多好聽的結他旋律，後者會以流行曲改編成 Fingerstyle，當然有很多兩者兼得的高手（更多的是熱愛彈譜的 Cover Player）。

和 Chord Melody 相比， Fingerstyle 同樣都係以純音樂為演奏目的，但相對更豐富，起伏更大，更有觀賞性及表演性，日本嘅押尾光大郎，法國嘅 Pierre Bensusan，澳洲嘅 Tommy Emmanuel 以及俄羅斯嘅 Alexandr Misko 都係一啲當代嘅 Fingerstyle 領航者。Palm Drum，Nail Attack，Tapping 等等都係一啲較為普遍嘅 Guitar Fingerstyle 技法。

以下係由我改編，加入了 Percussion Technique 嘅《突然好想你》（留意返，連調音都改成了 CGDGBE，想聽返個效果可以去我嘅 YouTube 參考）：

可能有人會問，如果冇加入咁多敲擊嘅技巧，彈下慢歌（Chord Melody），又算唔算係 Fingerstyle 呢？呢個問題其實好大爭議性，不過放眼國際就會發現，其實唔需要分得那麼細，好多指彈演奏家，例如以編曲細膩柔和嘅日本大師岸部真明，韓國指彈神童嘅鄭晟河，都會彈一啲以 Chord Melody 為主嘅慢歌，唔同嘅風格都一樣係叫 Fingerstyle Arrnagement。廣義黎講，Fingerstyle 漸漸地成為咗現時最主流嘅叫法。如果大家都有興趣，心動不如行動，即刻報名學結他了解更多啦～除此之外，我哋網站上面都有大量指彈樂譜免費收睇，希望大家可以有多啲資源練習～

有時我嘅學生會同我講返，鐘意 loop 住我個 channel 黎溫書或工作。的確，聽住一啲純結他音色，其實會令人放鬆而集中，去掉人聲嘅流行曲，既不需要消化歌詞，同時亦都保留到原汁原味嘅流行曲熟悉感。呢一種放鬆大腦嘅方法，其實就好似有人鐘意聽古典音樂，或者韓劇 OST 差唔多，相信都有好多 fingerstyle 愛好者都會有共鳴。

又講返香港，大家可能以為 Fingerstyle 係近十年先開始有，而其實比你想像中還早。喺呢度分享一個小故事，有一次押尾光太郎御用，日本殿堂級嘅 Pickup 系統 M-factory 創辦人三好英明先生黎香港探我，曾經同我講，佢教過年輕時嘅押尾彈 Michael Hedges 嘅作品！ Michael Hedges 係邊個？就係早於八十年代初期，就已經推出過加入大量敲擊技術嘅 Acoustic Fingerstyle Album ，屬於當代指彈結他嘅啓蒙者！近近地留意返，台灣都早於九十年代初期活躍起來，不得不說，香港起步還真的遲了好多。

好掛住三好先生親手整嘅蕎麥面。

或者對未聽過 Fingerstyle 嘅人黎講，結他只係可以用黎伴奏呢件事實在係根深蒂固，但係隨著呢幾年香港多咗好多同道中人一齊彈， 而且人材輩出，越彈越好，資源亦比起二十年前豐富得多，無論係咩類型嘅結他手，學返一兩首fingerstyle 傍身是常識吧！

最後我諗返起，幾年前曾經接受過網媒《Menclub》嘅訪問，當時佢為我個專訪改咗個 title，我覺得真的非常貼題：

《他，讓結他成為主角》。

就等我哋一齊令結他成為主角。

同步刊登於 Re:spect Magazine 271 期

香港長期處於高濕度狀態，夏天經常下雨，全年平均濕度維持在70%至80%。正在學習結他的你，又知不知道濕度如何影響結他的手感、耐用性以及音色呢？

濕度高低會影響木的彈性以及穩定性。濕度太高的時候，面板會漲起，琴頸亦會變形，這令弦距變高，手感變差。相反，若濕度太低，弦距變得過低，更有機會產生「癡fret」（buzz)的情況。

音色方面，濕度過高會令木材吸入過多水份。這樣除了會增加結他的重量之外，因為彈奏時的震動變小，結他共鳴亦會變小，這令結他音質下降。

弦線方面，濕度太高會加速生銹，令弦線壽命變短。生銹的弦線手感非常差，亦會影響結他的外觀。相反，若濕度太低，結他木紋會變得明顯，同樣影響結他顏值，嚴重的時候更有機會裂開！

其實40%至60%是最適合結他的濕度。為了好好保養結他，首先，我們可以在房間中設置抽濕機。不過抽濕機無法放濕，天氣過分乾燥的時候，結他木材還是有機會裂開。第二，我們可以在結他箱中設置防潮包或防潮珠，但這些防潮包同樣只會吸濕，並不會放濕，結他木材會處於非常不穩定的狀態。第三，其實冷氣機也能夠防潮，不過長期開冷氣機會令你的電費倍增。

來自美國的Boveda 雙向防潮包能夠有效地調節結他盒中的濕度，濕度太高的時候，它能吸濕；濕度太低的時候它又能放濕，可持續使用三至六個月，是比較有效保養結他的方法。現時到峰弦峰語試結他會免費送贈Boveda一包。溫馨提示，結他手亦可在結他中設置濕度計，這讓就能更準確地量度濕度。另外，結他盒要比結他袋更能有效防潮。

除了練習之外，樂器保養亦是樂手們不能忽視的一環。保養好樂器，彈奏時就能更得心應手。如果有不明白的地方，可以預約時間上門店找我們的結他 specialist 幫手解決你的疑問！

Here we have an English version from another specialist, Mercy. Hope you guys enjoy.