揀結他 - 面板篇（中）進階木結他面板攻略
其實 Spruce 面板又點止得 Sitka Spruce 一款呢？
前言
上回提要，我哋介紹咗兩款最主要嘅結他面板，分別係 Cedar 同埋 Sitka Spruce。但係作為結他愛好者嘅你，通常當你擁有過一兩支結他之後，唔多唔少仲會有內心空虛嘅感覺。作為進階結他愛好者，以下呢四款比較少見嘅進階面板，你一定要認識啦。
（如果大家錯過咗上一篇《揀結他 – 面板篇（上）：Sitka Spruce vs Cedar 全攻略》，可以去返我哋嘅網站 funguitar.com.hk )
Adirondack Spruce - 歷史洪流下屹立不倒，面板界金字塔的頂端
如果你需要更大嘅音量，更厚實嘅音色，咁 Adirondack Spruce 就係你嘅不二之選了。又名 Red Spruce，學名係Picea rubens，要追溯呢個面板嘅黃金時期，就要去到第二次世界大戰之前嘅時候，Adirondack Spruce 可以話係當時最主流嘅面板配置。時至今日，Adirondack Spruce 仍然喺普遍認知下，認為比 Sitka Spruce 更高階嘅選擇。外觀上大多數 Adirondack 嘅木結他會比 Sitka 更白（ Sitka 大多淺啡色，帶點 Pink Hue）。木紋色差較少而間距較闊。由於”白雪雪”同埋木紋疏落不一，所以也有着很好的辨識度。
喺音色上， Adirondack Spruce 非常厚實，各個頻段都飽滿有力，超強嘅 Articulation 會令你彈獨奏時嘅主旋律非常立體，並具擁有很高 Ceiling Level 嘅音量，極大力度去彈亦不易出現破音。我個人最鐘意嘅係當 Adirondack 結他慢慢變成一支舊結他後，音色會變得非常醇厚，就好似紅酒一樣。
要留意嘅係，由於呢種面板嘅剛性比較大，所以一般需要更大嘅推動力先可以駕馭，例如有留指甲彈 fingerstyle 嘅客人，或者指關節較大，勾線力道較大，甚至用 pick 嘅結他手。勾線力量較弱嘅同學仔彈呢種面板，就未必達到足夠嘅輸出，從而發揮唔晒成個面板嘅表現。
總括而言，Adirondack Spruce 喺好多位結他手心目中留低咗一個黃金位置，可以話每一位結他收藏家都至少有一支或以上。
Adirondack 木纹疏密不一
European Spruce - Fingerstyle 愛好者新寵，如奶油般超甜高頻
另一款大熱進階選項，就係 European Spruce (Picea Rubens)。比起呢個名字，其實我哋更多會叫返佢生長嘅地區位置，例如佢嘅生長位置喺德國嘅山脈，我哋就會叫佢做 German Spruce，如此類推。最常見嘅有German Spruce, Italian Spruce, Swiss Alpine Spruce, Carpathian Spruce 呢幾款。
外觀上，歐洲雲杉顏色呈 Creamy 奶油白，加上木紋相當綿密，遠睇落去好似油畫，相當漂亮。唔少 European Spruce 亦都會帶輕量嘅熊爪紋（bearclaw figure） 相當討喜。音色方面，佢有接近 Adirondack Spruce 嘅厚實及音量，但剛性較低更易推動。根據我嘅親身經驗，European Spruce 嘅結他高把位係非常之甜，我會形容為好有黏性，一粒貼住一粒，用黎彈 Ballad 嘅慢歌真係會令人停唔到。以至於我高度推介呢種面板俾所有彈 fingerstyle 嘅客人。
咁當然我哋講開 European Spruce，又點少得講埋 Moon Spruce 呢？我哋下一節再討論。
German Spruce Top
無論外表或聲音都很 Creamy 的 Italian
Aged Tone Spruce - 唔使彈幾十年，都可以擁有老琴嘅音色
第三款要講嘅，其實唔係一個品種，而係一啲經過後期處理嘅面板。佢嘅原理係透過將原材料進行加熱，例如係焗爐，令到佢原料嘅水份，及油分加速蒸發，不但減重後能提高發聲效率，更重要係營造出一種自然風乾，好似一支舊結他擺咗好耐嘅音色。
唔同嘅結他廠商，做法及叫法都有分別嘅。例如會叫 Aged Tone Top, 或者係 Baked Top, Thermal Top 等等。煮過嘅木，會呈現出接近茶色嘅狀態，望落又真係幾似一啲由六十年代第二次世界大戰時期嘅舊結他一樣。聲音方面，中頻乾爽帶有力，迴音更長，泛音亦很豐富，呈現出舊結他先有嘅 Open 感覺。由於比起一般 Spruce Top 更輕，更易駕馭，都係好適合指力不大嘅結他手，加上復古風當道，近年都有唔少人追捧呢個面板，例如 Bourgeois Guitars 嘅 AT Adirondack 就非常出名了。
Aged Top 結他真係會令人有一種穿越時空嘅錯覺
Aged Tune Top
Redwood - Cedar 及 Spruce 嘅混合體，暖入心嘅音色
最後一款要介紹嘅面板就係 Redwood 啦。 生長喺美國嘅 Redwood 係一啲非常高大嘅樹嚟。以前嘅主要用途係用黎作為一啲大型結構嘅支撐，或者用黎做傢俬，例如美國好多隧道都係用 Redwood 去樑架的。
外觀上，Redwood 大多呈暗紅色，木紋非常幼細，但剛性比起 Cedar 硬淨得多了。音色上，由於 Redwood 擁有近乎 Spruce 嘅剛性，會令到呢一種面板喺類近 Cedar 嘅溫暖基礎上，有著好似 Spruce 嘅顆粒感 (articulation)。中低頻柔和很 Woody，Low end 比起 cedar 更實淨（Cedar 比較融化），高音明亮乾爽。很適合用黎彈一啲比較滄桑嘅歌。講開 Redwood，當然一定要講埋更好高階我哋仲有 Sinker Redwood，下一節記得留意了。
Redwood Top 木纹嘅深度好令人著迷
