孤獨|伸手落水抓蝌蚪

出左歌循例都廢up一下先。

早一星期幫學生補堂,佢需要彈呢首歌應付公司表演(好寂寞嘅公司),咁就執左個前奏出黎啦(可惜最後佢用唔上)。後來同 kinglam 傾開知道佢好鐘意呢首歌,見佢平時咁靚仔又冇乜點,咁好啦編晒成首送俾佢。(利申:不表示 Kinglam 很寂寞 – WW 上) 然後有另一位好耐冇見嘅同學拎左佢支古典結他俾我 setup,一把現年十五歲嘅老琴。

三年前幫佢搵呢支琴果陣已經覺得好特別,我仲特登係 YouTube 彈左另一首歌留念。今次再見返,set 好琴換好弦,老朋友仍舊好聲。 點好聲法呢?我會形容係”孤獨”。『嘩你再抽象啲啊不如?』,唔明唔緊要,事關早兩日我錄左一小段《天黑黑》放左上 ig,有位朋友留言話唔係好明,就係果晚零晨三點,我啱啱傾完成個鐘美國長途電話之後,我就稍稍地描述一次: 「…起始粒感大而潤澤,綿綿的感覺很重,但延音又會在幾秒之間大幅減輕,以另一種甜味延伸,是以每個音都有這種孤獨的落差。」

十分鐘後,呢位朋友馬上講出一個更貼切嘅情景:「…伸手落水抓蝌蚪,頭極重尾極輕,然後遊走消逝,溜走的感覺。」

我絕對有理由相信,呢位朋友平日耐唔耐就會去”照田雞”。

孤獨|源於落差

不過我真心認為佢講得好。其實我地都同一個意思:孤獨,源於落差。一種因期望和現實不符而出現嘅不平衡心理狀態,繼而影響內分泌令你產生一種患得患失嘅想法及不安情緒(話到明癈up)。咁咩人最孤獨呢?唔係平安夜匿埋係屋企打機(或者寫譜 T_T)嘅毒男,而係果啲諗著衫諗三日,著到好型好靚,然後去左一個期待左成個星期而大家又當佢 nobody 嘅 party。又或者係,你同成班朋友嘻嘻哈哈交換埋禮物食埋糖水,然後得你一個住沙頭角或者大灣區,個個走晒得你凍冰冰一條友等一架遲左 n 分鐘都唔黎嘅巴士。

# 冷淡長路上歸家似個慣例 燈飾卻沒半點安慰 #

最後祝大家捉實自己果條蝌蚪。捉唔實嘅,就好好享受下佢自你掌心滑走果一剎那。 聖誕快樂 峰

PS. 講返首歌,少少 Jazz 味嘅感覺好好玩,Kinglam 識貨,RubberBand 加油。 PS. 如果你對孤獨嘅有更貼切嘅形容,歡迎亂入一齊癈up。

LONG FUNG T.

FOUNDER & DIRECTOR-GENERAL

峰弦峰語創辦人,Bourgeois Guitars 官方指定 Artsits。成日以為好得閒一日到黑彈結他然後結果做足廿四小時 Admin 嘅行政總監。

RubberBand 零度聖誕

Guitar
Strings
Tuning
Mic/PU
Mic-Pre
Interface

MW CONCERT 1992
Savarez Hard Gauge
EADGBE
Schaller External Contact PU
Internal
Tascam UH-7000

Share