測評|首試 Heichao 黑潮芒果木 AD M-58

鋒芒的外觀|初次與黑潮會面

前排Post左幾首Fingerstyle,包括《悄悄告訴你》、《但願人長久》,相信大家已留意到手上呢枝《黑潮》結他 — Custom Series 中的M58芒果木型號。一枝 $10000-$15000 嘅結他我地較常見嘅背側板配置都會係桃花芯木或玫瑰木,究竟呢把「南美芒果木」又有咩特別呢?

先講下,點解呢支琴會去到我手上先。事緣係,本身我有支琴係平時出show用,但用落一排發覺Dreadnought真係唔適合自己,所以最後平讓左俾個學生,而同時我又要搵返一支「替代品」(補充一下,呢支M58絕對係一個大upgrade)。有一日,阿峰突然搵我話嚟左批新琴,覺得會啱我,所以就叫我上去試下。果日係我面前嘅,一支就係呢支M58 ,另一支係MOM-X1 (改良OM全單桃花芯背側)。

本來我目標係搵一把7000左近嘅,所以係試左MOM-X1先嘅。一打開琴盒,支琴亮黑嘅噴漆真係反哂光,靚到不得了,再仔細睇,會發現成支琴都有條紅線binding圍繞住,包括指板,係好感覺到果種對手工嘅用心。欣賞完佢嘅外觀,拎上手彈,還好,聲音絕對對得住7000左近呢個價位,不過不失。音量比起Kepma同級系列會細少少,但對我而言唔係問題,因為呢支琴係預左裝pickup,出show用嘅,所以本身靚仔已經加左分!

對決|芒果木的驚喜

既然一場嚟到,無理由唔試埋另一支嘅,於是又打開盒,意料之內嘅靚仔亮黑、精細手工,反轉一睇⋯⋯哇老細,金黃色、浮誇嘅木紋,原來芒果木嘅真身係咁嘅樣,我都係果刻先知。一拎上手,隨意彈左粒A音,有啲愕然,當下覺得個聲好「彈」,唔似一般結他嘅聲。淺彈多一陣,好特別,同一首歌但佢仿似帶左另一種味道出嚟。而坦白講,呢支比起MOM-X1更好聽,於是就出事了⋯⋯當下,我陷入左一個選擇困難嘅情景⋯⋯

果晚返屋企諗左晚,理性分析下其實偏向MOM-X1 ,主要考量係Budget。不過試完M58真係有啲念念不忘,佢嘅聲音確實有種個人特色,而且背側板亦好靚,不過佢嘅價錢,更加「靚」,直頭out budget⋯⋯攪到我忍唔住,2點幾都whatsapp阿峰去傾。當然,最後結果就大家都一早「劇透」左啦。第二日,我就上返阿峰度攞佢走,阿峰亦同我一齊調整下支琴,磨fret,setup等,調整到最適合我嘅手感。話說呢支雖然係Dreadnought,但明顯比平常Dreadnough細一個碼,所以我係覺得彈落舒服嘅。

呢個決定主要係我真係對呢把琴特別嘅聲音抵受唔到誘惑,不過背後仲有一個小故事可以分享下。話說從阿峰口中所知,呢支M58原身係一支Signature Model,係製琴師造過俾一位songwriter,其後呢位songwriter同呢支琴寫左首歌嚟講佢。而我自己亦作為一位songwriter,相信我絕對配得起呢支琴!⋯⋯umm,最多挨一排麵包,或者食少啲囉⋯⋯

Anyways,最近我有一首為一位金門好友寫嘅歌曲《再次遇見》,亦用左M58錄製當中嘅Rhythm Guitar部分,呢首歌亦係我第一首真正上架到各大平台嘅歌。

好慶幸我無因為Budget而放棄左呢支M58 ,甚至老套啲講,知道左支琴嘅小故事後,我覺得同佢相遇係命中註定。

芒果木簡介|中頻有力、反應好快、溫暖中帶點甜

我地先認識一下「芒果木」呢種木頭:與桃花芯木一樣,芒果木係歸類為「硬木」,所謂「硬木」即是一般密度較高及較硬實。而芒果木屬於當中比較軟嘅木頭,硬得嚟又唔重,主要產地係東南亞地區,內裡嘅木紋多數較不規則,顏色偏啡中帶金,亦有時會係較淺色嘅橙黃色,甚至好彩嘅話,會帶一點綠色,真係好似一個芒果一樣。佢嘅木紋同顏色夾埋一齊其實非常靚!加上佢作為硬木中相對較軟嘅木頭,較容易切割,而且防水性高,所以好多人會用嚟製造傢私,甚至係雕塑品。當然,亦唔少得會用嚟做樂器啦,包括結他,Ukulele,甚至係小提琴都會用到芒果木!

呢種木頭嘅聲音特性又係點呢?佢嘅聲音同相思木嘅特性有啲似:中頻有力、反應好快、溫暖中帶點甜,雖然仍唔及玫瑰木果種低沈,飽和嘅甜,但高頻會比玫瑰木更清晰。而芒果木同相思木嘅分別,就係佢高頻表現會更清脆,整體聲音亦較乾,同玫瑰木果種迴正正相反。總括嚟講,佢嘅低、中、高頻表現屬於較平衡。不過網上亦有人提及,芒果木嘅聲音好與壞好睇塊木頭嘅硬度,若果唔夠硬,出嚟嘅聲會大打折扣!

清澈而厚實|聲音特色淺析

介紹咗芒果木咁耐,相信大家最關心,其實都係呢枝結他嘅聲音究竟係點!係我第一次攞上手彈時,我覺得枝琴嘅聲音同一般玫瑰木比,係佢每粒音都好有彈性,好有粒感,Attack time 相對的確係較短,反應好快。延音則較玫瑰木短,真係「嚟得快,散得快」,雖然不及玫瑰木咁迴,但正正因為咁而好適合掃chord,唔會出現果種浪嚟浪去嘅混濁。低頻力度平平,可能因為D桶形嘅關係,卻又帶返一點溫暖,彌補左力度不夠厚實嘅弱點。中頻嚟講係非常突出,會聽到一、二、三弦嘅低把位旋律係非常 outstanding,好適合以 fingerstyle 彈奏一啲簡單嘅小品。至於高頻,力度明顯無中頻咁多,但亦唔會覺得佢笠咗水,依然保留到一種清脆,又唔會覺得好尖嘅聲音。

順便做下植入式廣告,大家可以去聽返呢首《悄悄告訴你》去聽下佢嘅表現,正正係走勻晒低、中、高把位。

總結

呢支琴,果然無令我失望,佢係錄音室嘅表現好好,喺監聽耳機聽住都覺得好舒服,錄完出嚟佢嘅特性更加明顯,更加好聽!連當日嘅錄音師都話,聽得出呢支琴同平時聽開嘅結他有唔同。一支琴究竟幾有料,其實入到錄音室真係呃唔到人,因為平時我地身處地方唔同,房間acoustic唔同,同一支琴聽到嘅聲都會有啲分別(例如房間如果較空洞,會聽到迴音都大啲,低頻會多啲,等等)。但係專業錄音室,一定係最「乾淨」,係好聲就係好聲,衰聲也會更衰聲XD。

總括而言,呢枝琴絕對係一支 all rounded 嘅琴,掃 chord 暖和、清澈;Fingerstyle 旋律顆粒重、高頻乾淨。對於我嚟講,時不時會接一啲表演,或者朋友邀請一齊夾下歌,呢枝琴係一枝絕配,基本上可以應付到幾乎所有嘅場合。而且,枝琴嘅外形真係型到爆,有次去屯門大會堂表演,好多人都 focus 咗喺佢鋼琴黑咁特別嘅外表,無發現過我彈錯野。