消息|心繫澳洲 God Bless Australia

我們心繫香港,同樣心繫澳洲。當世界為我們發聲,作為香港人亦應該關心世界。

經過所有全體導師同意,峰弦峰語決定略盡綿力,捐出十二月份的其中一天總收入(約四千元港幣),分別捐給負責救火的消防機構及救助樹熊工作。在此我感謝每位導師的熱心。同樣亦希望大家可以盡一分力。捐款以外,亦請大家支持環保,並好好愛惜手上的結他,不要浪費每一棵珍貴的樹的第二生命。

峰弦峰語創辦人及總監
Long Fung Tam


阿峰扎記 #3|同學仔,你買啱結他弦未?

《阿峰扎記》|峰校長的每周筆記

據史書記載,自峰掌門自創立本門派後,未敢有忘昔日讀書時刨 Journal 的習慣
日子有功,滴水穿石,累積了大量結他冷知識,秘聞,趣聞,奇聞,新聞,正史,野史,八掛等
命名為 《阿峰結他扎記》,簡稱《阿峰結扎》,及後為免妨礙峰校長開枝散葉改稱為《阿峰扎記》

5個%|缺一不可

上回提要,好嘅結他就好似一班精通玩“以訛傳訛”嘅同學一樣,能夠喺傳遞故事(能量)嘅過程中盡量減少流失,務求達到最真實嘅還原(轉化成嘅音色);但同時亦都唔好忘記,根據外國研究,其實以物理學嘅角度講,結他嘅能量轉換(由弦嘅勢能輸出至聲能)其實只有大約 5%!
傳奇日本結他手押尾光太郎嘅御用制琴師 John Greven 都曾經係一篇 Journal 提到,如果因為某啲嘅部份/組件接合得唔夠好損失咗 1%,其實亦係等於損失咗最終整體輸出音量的 20%!一齊黎高呼(Go through)一下每個部份,話唔定有啲 DIY 嘅項目,可以令你立刻提高結他嘅效率!

左圖為 John Greven

買啱弦線 = 提升效率

冇錯,最快嘅方法就係買一包拉力(Tension / Gauge)較高嘅結他弦,因為拉力較高,相對能輸出嘅力量會較大;坊間來說接拉力大約分四種:Extra Light(俗稱 0.010 ),Custom Light(俗稱 0.011 ),Light(俗稱 0.012 ),Medium(俗稱 0.013 ),如果你覺得結他的音量不夠,其實換大一級拉力,分別就很明顯了。不過要留意,所有事情都要等價交換的。換大一級拉力,意味著弦芯較粗,同時亦需更大嘅力度令佢變形。即係話,會難㩒咗,同時你亦可能覺得會痛咗。

 

註:0.01X" 呢個數值,係指最幼嘅第一弦嘅橫切面嘅直徑,並以 inch 做單位。

音量大固然好|小心等價交換

一般來說,我建議大部分有一定程度嘅男女同學都用 Light。有些女同學話:"我怕痛,朋友建議我買 Extra Light 喎!";這個說法其實也沒有甚麼不妥,不過我個人意見係,其實學結他,適當哋感到手指頭痛在所難免,關鍵係弦距係唔應該影響你彈琴嘅表現,以及你嘅所受嘅痛苦,係合理範圍內。有些同學的結他弦距過高而又不曾 Setup ,甚至用 Extra Light 也會覺得痛;而有些結他經 setup 後,也可以做到甚至按 Medium 的弦也毫不吃力。
所以我認為最正確嘅做法,係要將結他先去檢查和 setup,確保你受嘅痛係合理嘅範圍內,而不是一開始就選擇 Extra Light,以手感犧牲音量,或者一開始就買過大拉力嘅弦,為得到音量然後白白受苦。

買粗弦留意|你支結他受唔受得住?

提升效率當然好,但同時也要小心,有啲結他嘅琴橋係受唔到呢一份拉力,例如美國四大手工琴之一 Bourgeois 最為著名嘅型號 Soloist 所配的 “金字塔式琴橋” (Pyramid Bridge),講明最多只能用 Light 的弦線,否則可能破壞結他! 同樣地,如果在 setup 得接近物理極限的結他換低一級的拉力也可能會做成痴 fret!(打品,Fret Buzzing,彈奏是出現金屬撞金屬的雜音);或者因為弦線的受力角度太少而影響音色。
所以總結一下,大家如果經驗不足,換拉力之前,最好還是帶備結他咨詢一下可信賴的木結他維修技術人員(峰弦峰語學生們,歡迎你哋帶結他返黎俾我哋望望)。下一章,我哋將會講下咩叫下枕(Undersaddle)。

阿峰扎記 #2|好嘅結他,就係以訛傳訛嘅高材生

《阿峰扎記》|峰校長的每周筆記

據史書記載,自峰掌門自創立本門派後,未敢有忘昔日讀書時刨 Journal 的習慣
日子有功,滴水穿石,累積了大量結他冷知識,秘聞,趣聞,奇聞,新聞,正史,野史,八掛等
命名為 《阿峰結他扎記》,簡稱《阿峰結扎》,及後為免妨礙峰校長開枝散葉改稱為《阿峰扎記》
上回提要係:原來我哋細個玩開嘅以訛傳訛,竟然係木結他發聲嘅最基礎原理?

想像一下|一班分成兩行嘅同學

我哋假設一下,結他嘅所有部份,就係一班分成兩行嘅同學,而你就係老師;當你講咗一個故仔(勾弦)俾呢兩行嘅第一個同學仔聽(下弦枕及上弦枕 ),佢哋就會將呢份個故仔(動能)一直傳落去,直到最後每行最後果兩個同學仔(面板/側板及背板,即共鳴箱)合作講返呢個故仔出黎(聲能),亦即係我哋一直以黎熟悉嘅結他聲。

左圖為電影 《The School of Rock》 劇照

好嘅結他|以訛傳訛嘅高材生

好嘅結他,我哋可以想像為精通呢個遊戲嘅一班高材生:傳送得快,同時又傳送最多及最低失真嘅能量,我哋可以稱之為高效率嘅結他。同時亦都解悉到點解有得結他會大聲啲,又點解有啲結他會延音長啲,結實啲,一切都同能量嘅多少有關。如果只有靚聲,而效率很低,咁呢一把琴只係一把自私嘅琴,聲音好好,但就得你一個聽到囉。

只有 5%|任你驚為天人

咁即係好結他,就可以傳送出 100% 嘅能量化為聲音呢?抱歉,由於結他嘅物理限制關係,其實好多力量都喺傳送嘅過程消失咗,就好似你會你感覺得結他嘅震動,所以有很大部份會去咗動能,並散失為熱能。根據外國關於弦樂樂器嘅研究顯示:結他動能轉化成聲能嘅效率,大概只有 5%,亦即係話,任你個個同學仔都係記憶力驚為天人,其實最後,成個故仔只係得 5% 係真嘅。
既然得返 5%,咁究境點樣可以將呢 5% 發運到最好呢?下一集我哋會講下各自嘅結構到底分別嘅作用係點運作,想唔想知換咩小配件可以令到能量可以保存到最多?下期再續。

阿峰扎記 #1|咩叫做好結他?先要識玩以訛傳訛

《阿峰扎記》|峰校長的每周筆記

據史書記載,自峰掌門自創立本門派後,未敢有忘昔日讀書時刨 Journal 的習慣
日子有功,滴水穿石,累積了大量結他冷知識,秘聞,趣聞,奇聞,新聞,正史,野史,八掛等
命名為 《阿峰結他扎記》,簡稱《阿峰結扎》,及後為免妨礙峰校長開枝散葉改稱為《阿峰扎記》

前言|致好奇的你

呢幾年有時我教教下班,都會忍唔住分享一啲結他嘅冷知識,有時仲會講到超晒時,其實我嘅知識係邊度黎呢?大概就係呢幾年開始重拾返當年讀 PSY 嘅習慣:刨 Journal。當中包括製琴師嘅,科學嘅,甚至一啲歷史上嘅資料,日子有功,筆記都抄滿咗兩本。有唔少同學仔建議話"聽唔切,不如你寫返專欄啦(其實以前受某青少年刊物邀請,寫過十幾期)"。我話今時今日仲有人睇啲咁悶嘅嘢咩?我感覺連連載懸疑小說都冇咩人追(其實可能都係寫得悶)。
然後竟然有同學話:我就係睇咗幾年前你寫落果篇所以黎學(平和貴結他分別到底在哪裡)。你唔寫,又點對得峰弦"峰語"呢?咁我又 buy 果位同學仔嘅,就算冇咩人有興趣,咁咪當自我調整一下心態囉,滿足一下少數有足夠耐性睇字嘅朋友之餘(總有學結他嘅朋友有同我一樣嘅求知慾),又當係幫自己複習一次,助人自助,win win。講完廢話,開波!

以訛傳訛|越離題越好玩

早兩星期返左同班中同一齊返左學校,令我諗起我以前係學校玩過一個遊戲:全班每行坐第一排嘅同學出去聽老師講咗個故仔,然後返埋位,細細聲傳俾坐後面嘅同學,直到最後一排嘅同學。然後每一行坐最後同學就企喺身講返個故仔出黎(通常大家最後都離晒題),睇下邊個講得最似原著就算贏。以上嘅情節大家都好熟(車,咪係以訛傳訛"囉),仲可能玩過好多次,之不過,你又知唔知,你支結他其實每日都玩緊?作為重新執筆嘅第一章,等我用一個稍為科學嘅角度,同大家重新分析一下咩叫做好嘅木結他。
Photo by Ben White on Unsplash

LEVEL OF EFFICIENCY|效率,等於一切

要評價一支木結他好唔好,首先要了解結他嘅效率 (Level of Efficiency); 而要了解效率,首先要知道咩係能量,同埋能量轉換(Energy Transfer) 啦 。簡單黎講,其實由你彈一條弦,到你聽到聲音,能量就已經喺結他入面經過每一個部份不停轉換。

由你手指壓/勾弦的一刻, 能量會隨住弦線分兩個方向流動:

1. 弦(勢能=轉為=動能) > 下弦枕 (Saddle) > 琴橋 (Bridge) 及弦釘(Pins) > 面板 (Top) > 音樑結構 (Brace Structure) 及 背板側板(Back / Side) > 聲音 (動能=轉為=聲能)

2. 弦(勢能=轉為=動能)> 品絲(Fret) 及上弦枕 (Nut) > 指板(Fretboard) 及琴頭(Head) > 琴頸 (Neck) > 音樑結構 (Brace),面板 (Top) 及 背板側板(Back / Side) > 聲音(動能=轉為=聲能)

沒錯,木結他嘅發聲原理就係一次"以訛傳訛"。實際情況係點?咁係咪要有 100% 嘅效率先叫做好嘅結他?下集繼續。

測評|首試 Heichao 黑潮芒果木 AD M-58

測評|首試 HEICHAO 黑潮芒果木 AD M-58

鋒芒的外觀|初次與黑潮會面

前排Post左幾首Fingerstyle,包括《悄悄告訴你》、《但願人長久》,相信大家已留意到手上呢枝《黑潮》結他 — Custom Series 中的M58芒果木型號。一枝 $10000-$15000 嘅結他我地較常見嘅背側板配置都會係桃花芯木或玫瑰木,究竟呢把「南美芒果木」又有咩特別呢?
先講下,點解呢支琴會去到我手上先。事緣係,本身我有支琴係平時出show用,但用落一排發覺Dreadnought真係唔適合自己,所以最後平讓左俾個學生,而同時我又要搵返一支「替代品」(補充一下,呢支M58絕對係一個大upgrade)。有一日,阿峰突然搵我話嚟左批新琴,覺得會啱我,所以就叫我上去試下。果日係我面前嘅,一支就係呢支M58 ,另一支係MOM-X1 (改良OM全單桃花芯背側)。
本來我目標係搵一把7000左近嘅,所以係試左MOM-X1先嘅。一打開琴盒,支琴亮黑嘅噴漆真係反哂光,靚到不得了,再仔細睇,會發現成支琴都有條紅線binding圍繞住,包括指板,係好感覺到果種對手工嘅用心。欣賞完佢嘅外觀,拎上手彈,還好,聲音絕對對得住7000左近呢個價位,不過不失。音量比起Kepma同級系列會細少少,但對我而言唔係問題,因為呢支琴係預左裝pickup,出show用嘅,所以本身靚仔已經加左分!

對決|芒果木的驚喜

既然一場嚟到,無理由唔試埋另一支嘅,於是又打開盒,意料之內嘅靚仔亮黑、精細手工,反轉一睇⋯⋯哇老細,金黃色、浮誇嘅木紋,原來芒果木嘅真身係咁嘅樣,我都係果刻先知。一拎上手,隨意彈左粒A音,有啲愕然,當下覺得個聲好「彈」,唔似一般結他嘅聲。淺彈多一陣,好特別,同一首歌但佢仿似帶左另一種味道出嚟。而坦白講,呢支比起MOM-X1更好聽,於是就出事了⋯⋯當下,我陷入左一個選擇困難嘅情景⋯⋯
果晚返屋企諗左晚,理性分析下其實偏向MOM-X1 ,主要考量係Budget。不過試完M58真係有啲念念不忘,佢嘅聲音確實有種個人特色,而且背側板亦好靚,不過佢嘅價錢,更加「靚」,直頭out budget⋯⋯攪到我忍唔住,2點幾都whatsapp阿峰去傾。當然,最後結果就大家都一早「劇透」左啦。第二日,我就上返阿峰度攞佢走,阿峰亦同我一齊調整下支琴,磨fret,setup等,調整到最適合我嘅手感。話說呢支雖然係Dreadnought,但明顯比平常Dreadnough細一個碼,所以我係覺得彈落舒服嘅。
呢個決定主要係我真係對呢把琴特別嘅聲音抵受唔到誘惑,不過背後仲有一個小故事可以分享下。話說從阿峰口中所知,呢支M58原身係一支Signature Model,係製琴師造過俾一位songwriter,其後呢位songwriter同呢支琴寫左首歌嚟講佢。而我自己亦作為一位songwriter,相信我絕對配得起呢支琴!⋯⋯umm,最多挨一排麵包,或者食少啲囉⋯⋯
Anyways,最近我有一首為一位金門好友寫嘅歌曲《再次遇見》,亦用左M58錄製當中嘅Rhythm Guitar部分,呢首歌亦係我第一首真正上架到各大平台嘅歌。好慶幸我無因為Budget而放棄左呢支M58 ,甚至老套啲講,知道左支琴嘅小故事後,我覺得同佢相遇係命中註定。

芒果木簡介|中頻有力、反應好快、溫暖中帶點甜

我地先認識一下「芒果木」呢種木頭:與桃花芯木一樣,芒果木係歸類為「硬木」,所謂「硬木」即是一般密度較高及較硬實。而芒果木屬於當中比較軟嘅木頭,硬得嚟又唔重,主要產地係東南亞地區,內裡嘅木紋多數較不規則,顏色偏啡中帶金,亦有時會係較淺色嘅橙黃色,甚至好彩嘅話,會帶一點綠色,真係好似一個芒果一樣。佢嘅木紋同顏色夾埋一齊其實非常靚!加上佢作為硬木中相對較軟嘅木頭,較容易切割,而且防水性高,所以好多人會用嚟製造傢私,甚至係雕塑品。當然,亦唔少得會用嚟做樂器啦,包括結他,Ukulele,甚至係小提琴都會用到芒果木!
呢種木頭嘅聲音特性又係點呢?佢嘅聲音同相思木嘅特性有啲似:中頻有力、反應好快、溫暖中帶點甜,雖然仍唔及玫瑰木果種低沈,飽和嘅甜,但高頻會比玫瑰木更清晰。而芒果木同相思木嘅分別,就係佢高頻表現會更清脆,整體聲音亦較乾,同玫瑰木果種迴正正相反。總括嚟講,佢嘅低、中、高頻表現屬於較平衡。不過網上亦有人提及,芒果木嘅聲音好與壞好睇塊木頭嘅硬度,若果唔夠硬,出嚟嘅聲會大打折扣!

清澈而厚實|聲音特色淺析

介紹咗芒果木咁耐,相信大家最關心,其實都係呢枝結他嘅聲音究竟係點!係我第一次攞上手彈時,我覺得枝琴嘅聲音同一般玫瑰木比,係佢每粒音都好有彈性,好有粒感,Attack time 相對的確係較短,反應好快。延音則較玫瑰木短,真係「嚟得快,散得快」,雖然不及玫瑰木咁迴,但正正因為咁而好適合掃chord,唔會出現果種浪嚟浪去嘅混濁。低頻力度平平,可能因為D桶形嘅關係,卻又帶返一點溫暖,彌補左力度不夠厚實嘅弱點。中頻嚟講係非常突出,會聽到一、二、三弦嘅低把位旋律係非常 outstanding,好適合以 fingerstyle 彈奏一啲簡單嘅小品。至於高頻,力度明顯無中頻咁多,但亦唔會覺得佢笠咗水,依然保留到一種清脆,又唔會覺得好尖嘅聲音。
順便做下植入式廣告,大家可以去聽返呢首《悄悄告訴你》去聽下佢嘅表現,正正係走勻晒低、中、高把位。

總結

呢支琴,果然無令我失望,佢係錄音室嘅表現好好,喺監聽耳機聽住都覺得好舒服,錄完出嚟佢嘅特性更加明顯,更加好聽!連當日嘅錄音師都話,聽得出呢支琴同平時聽開嘅結他有唔同。一支琴究竟幾有料,其實入到錄音室真係呃唔到人,因為平時我地身處地方唔同,房間acoustic唔同,同一支琴聽到嘅聲都會有啲分別(例如房間如果較空洞,會聽到迴音都大啲,低頻會多啲,等等)。但係專業錄音室,一定係最「乾淨」,係好聲就係好聲,衰聲也會更衰聲XD。
總括而言,呢枝琴絕對係一支 all rounded 嘅琴,掃 chord 暖和、清澈;Fingerstyle 旋律顆粒重、高頻乾淨。對於我嚟講,時不時會接一啲表演,或者朋友邀請一齊夾下歌,呢枝琴係一枝絕配,基本上可以應付到幾乎所有嘅場合。而且,枝琴嘅外形真係型到爆,有次去屯門大會堂表演,好多人都 focus 咗喺佢鋼琴黑咁特別嘅外表,無發現過我彈錯野。

冷知識|淺談中國風:由《周禮》到周杰倫

淺談中國風|何謂五聲音階?

中國風其實也蠻容易辨認的,除左會有中樂作為背景,最重要就係 “無法無天”(無f無t),也就是使用五聲音階,Pentatonic Scale。最早出在《周禮。春宮》
簡譜:1,2,3,5,6
唱名:d,r,m,s,l
中樂:宮,商,角,徵,羽
為甚麼呢?說起來,就要從古時中國人學音樂說起了。
圖片節錄自周杰倫《紅塵客棧》MV

三分損益法|你的數學荒廢了嗎?

小弟不才,翻譯一下:古人以敲竹為樂,但是怎樣去得知竹的長度要多長,才能找到自己想要的音呢?
原來在春秋時,已有一套較科學的方法計算了:就是先以一跟長度單位為 81 的竹作為“宮”音 (d), 減去三份一後,81-27=54,也就是“商”音(r) ,

再用商的長度為準則,加上1/3,也就是 54+18=72,得出“角”音(m),

再用角的長度為準則,減去1/3,也就是 72-24=48, 得出“徵”音(s),
最後,再用徵的長度為準則,加去1/3,也就是 48+16=64,得出“羽”(l),
如此,你只要集齊這五根長度不一的竹管(81,72,64,.54,48),就能學古人一樣敲竹為樂了。而當中因為這五個音的來源,又產生了不少的故事啊。
現在來說,只要運用d, r, m, s, l 這五個音得宜,你也能創作一首有點中國風的歌呢!
大家聽聽,在紅塵客棧,還是青花瓷中,也就是這樣的。在學結他的朋友要留意了。

測評|Kinglam 首測 Bourgeois Vintage OM

第一支抵港嘅行貨 Bourgeois Guitars

今日介紹一支Bourgeois guitar,呢支Vintage OM除左係第一支黎到studio既Bourgeois guitar之外,仲係佢地 2019 NAMM Collection其中一支!聽阿峰講,呢支琴因為好代表到 Bourgeois Guitars 嘅音色,加上又非常有紀念價值,所以佢已經列咗呢支琴為非賣品。等大家可以上黎隨時感受到呢支結他嘅威力,又可以借俾我哋呢班徒弟錄音。

簡單講下支結他既配置先。面板係用Adirondack Spruce,俗稱紅雲杉。而背側就用 Indian rosewood。另外值得一提係呢支結他起bracing, finishing同埋animal protein glue上都選用左aged tone呢個option。

到峰弦商店查看更多

她的聲音有種很「化」的感覺

根據以上資料,大概會想像到佢既聲音會係點。首先,OM桶型結他中高頻會較突出,低頻較弱,而且音量較細,比較適合指法或演奏曲。但選用Adirondack Spruce Top,可以令聲音有所不同。其聲音特性是音量大、動態較闊,而且不會因為大力彈奏而影響清晰度,所以可以補償OM桶型音量較小的問題。另外,因為其為戰前結他常用的面板,再配合aged tone,預期除了外型有vintage guitar的味道外,聲音上亦會有,適合彈奏的類型應該大大增加。

好,實際彈奏後感覺又如何呢?坦白說,第一次彈的時候沒有太大驚喜。但經過彈奏開聲後,慢慢發現很多討好的地方。首先,六條線非常平均以及清晰,很適合用作錄音。其次,一支OM桶型結他音量及低頻居然都有很好的表現,量很足夠而且不減清晰度(錄音時甚至覺得低頻太多) 另外,亦是我最喜歡的一點,她的聲音有種很「化」的感覺,這應該就是aged tone的效果。最後不得不提對於身型細小既我黎講,彈得好舒服之餘,又唔需要放棄音色,同埋Vintage model真係好靚!

如果想聽聽用佢黎彈獨奏既聲音,可以去聽下我彈盧廣仲既《明仔載》,謝謝大家。

盧廣仲|明仔載 Guitar Fingerstyle

消息|傳奇級品牌 Bourgeois Guitars 向世界介紹峰弦峰語

專業|以初心,守護初心

十年後,峰弦峰語由小小的劏房教室,到今日衝出國際。

峰弦峰語 FUNGUITAR 成為香港嘅 Bourgeois Guitars 獨家經銷商,亦係全香港首間直接引入北美四大手工結他嘅本土品牌。在此感謝 Bourgeois Guitars 嘅支持,我哋將會一直以初心及專業態度去教育及推廣 Fingerstyle guitar,同時守護住我哋每一個品牌。

從來我最大嘅願望,都係為咗令到每位學生,舊學生為曾經加入峰弦峰語而覺得慶幸和自豪。深深領略到,惟有不斷進步,先對得住身邊默默支持嘅朋友。所以呢幾年就算冇咩再彈歌俾大家聽,教務及對外嘅工作都已經令我不勝負荷。

或者簡單啲諗,我只係想證明,我哋香港人,一樣都做得到;只要有心,就算係呢個彈丸之地,彈本土粵語作品,一樣都可以得同國際嘅認同。

要令全世界認識咩係香港人,就靠我哋每一位了。

全文如下

Bourgeois Guitars is pleased to announce the addition of our newest international dealer, FUNGUITAR, in the Hong Kong Special Administrative Region.

Started in 2009, FUNGUITAR is a renowned guitar school founded by Long Fung Tam, a Hong Kong native and fingerstyle musician widely known for solo guitar arrangements and performances. The school is attended by over 300 students who are mentored by a team of accomplished professional teachers.

In celebration of their 10th anniversary, FUNGUITAR decided to branch out into the retail guitar business. Long’s objective is to offer students and local guitar enthusiasts a greater variety of high end fingerstyle guitars than what is presently available in Hong Kong. On a recent trip to the US where he was researching high end guitar brands, Long encountered and fell in love with Bourgeois Guitars. In his words, “Bourgeois guitars consistently stood out, exhibiting ideal balance and clarity for fingerstyle playing”. As a result of this experience, in December of 2018 FUNGUITAR became the first Direct Importer of Bourgeois Guitars in Hong Kong.

In March of 2019, Long was invited to the Bourgeois Guitars’ shop in Lewiston, Maine. During his week-long visit, he learned how Bourgeois guitars are created, maintained and repaired. Long also collected and produced an abundance of promotional videos, photographs and interviews with Dana and the crew at Bourgeois Guitars.

While he was on site at Bourgeois, Long took advantage of a unique opportunity to select the wood for a number of initial orders, including a 12-Fret Slope D and a customized Soloist and for his own personal use.

Long envisions establishing a collection of directly imported, custom fingerstyle guitars that reflect the wide variety of models, tonewoods, and options available to fingerstyle players through the Bourgeois line. FUNGUITAR’S first major shipment of guitars is scheduled to arrive in August, and will be accompanied by a party hosted by Long and FUNGUITAR in celebration of the event. The festivities will be publicized on funguitar.com.hk. Be sure to keep an eye on FUNGUITAR’S Instagram and YouTube feeds as well.

FUNGUITAR is the Sole Authorized Dealer of Bourgeois Guitars in the Hong Kong Special Administrative District. We are pleased to welcome our new partners to the Bourgeois family of international dealerships, and look forward to collaborating with FUNGUITAR on the design and production of many exciting custom guitars.

 

https://bourgeoisguitars.net/…/bourgeois-guitars-welcomes-…/


隆重登場|十周年全新網站(上)

第一階段革新|六大更新重點你要知

踏入十周年,除了繼續做好結他教育的本份,峰弦峰語決定為香港的結他界做得更多
全新網站佈局,更多資訊,更多作品,立志為打造首個屬於香港人的木結他網上雜誌

作品全集|分類更仔細

久未更新的作品全集帶來更多快速分類,讓大家更容易找到想看的內容;另外由最新的文章開始都會有更詳盡的 Gear List 讓大家知道我們的錄音情況。

作品全集

文章全集|測評冷知識

全新網站目標可以成為一個專屬香港人的網上木結他雜誌,因此文章全集集合了測評,教學,訪問(快將推出)於一身,由我們的編緝為大家搜羅更多不同的木結他資訊,讓你更了解技術快速提升!

文章全集

品牌故事|峰弦的誕生

重新整理一次峰弦峰語創立的時間表,并附有 RTHK 對 Long Fung Tam 的獨家專訪。

品牌故事

結他課程|特色大更新

全新的結他課程簡介,讓大家更輕易理解我們課程的特色。另外我們亦設有全新的課程報名表,讓大家更容易加入峰弦峰語的課程。

課程簡介立即報名

峰弦商店|即查看庫存

在峰弦商店不僅可以找到我們的商店特色,而且更可以在網上查看店舖的庫存,讓你更輕易掌握可以過來親身試帶及帶走的現貨。

峰弦商店

品牌介紹|代理資料庫

為大家集合了 Bourgeois Guitars 及 Furch Guitars 的品牌歷史,型號介紹,訂購資料等重要資訊。讓大家更全面地了解各個品牌的背景及特性。

品牌介紹|Bourgeois品牌介紹|Furch

過往眾多份 Fingerstyle 樂譜密碼暫時失效,因為準備迎來下年度春季的第二階段更新。在此之前,我們留了幾份指彈獨奏譜讓家直接觀看下載。

指彈獨奏