Mythbuster|十個木結他的常見迷思(上)

十個木結他的常見迷思(上)

在練習同教學時都聽過不少「結他界都市傳說」,今集同大家淺談其中三個,希望幫到大家解決心中疑問!

身型較細粒一定要買37吋?|手感是王道

有時聽到朋友買結他會以「結他幾多吋?」去揀結他。而我既建議係:你估揀電視咩?乖,親身拎上手試左先啦!

對結他新手黎講,「手感」係買結他首要考慮!「手感」涉及結他 body、琴頸闊度、弦距等因素。坊間所講既尺寸一般指琴頭最頂點到琴身最底邊的直線距離。事實上,因為結他有不同形狀的桶身設計,如 OM/Dreadnaught/GA ...直接影響右手擺放的舒適度,變相影響正確勾弦的姿勢,所以單憑用「尺寸」決定會墮入陷阱,練習時先發覺「中伏!彈落唔舒服嘅…」

點解成日彈錯弦?|身型高大先揀D桶?

教學經驗:見過不少身型細小既同學其實拎起正常 size 結他,右手勾弦協調得無問題,反而拎較細的「37吋」結他時右手會不穩定滑向前,引致經常勾錯弦。

個人經驗:以前錯覺係 D 桶好大舊,生得唔高搞唔掂...點知有次拎住黑潮 Full solid D 桶試聲:咦?右手輕鬆喎!

所以眼見未為真,琴身厚度、手枕位等細節都影響手感,都係果句,拎上手試啦!

「電木結他」身世之謎|究竟係「木結他」定「電結他」?

不少初學結他既朋友都會問咩係「電木結他」,襯呢個機會簡介下其實「電木結他」並不屬於一種結他類別,真正身份係木結他,只係額外安裝左 Pickup(拾音器),幫助擴大結他聲,可透過導線將訊號接駁音箱(Amp),就好似你唱歌時,加左枝咪收音咁,適合舞台/街頭表演/錄音等效果。

「電木」外型/演奏技巧依然同木結他一樣,唔好誤會係彈「電結他」呀!無論買古典/鋼線結他,都可加裝 pickup,變成坊間講既「電木」!

Photo from Andertons.co.uk

結他斷弦先需要換弦?|唔換弦又如何?

「定期換弦」係保養結他最入門法則!當佢屋企床單咁,用耐左有汗漬記得換啦!

弦線的新鮮度/音質由換上第一日開始下降,就算唔彈都會逐漸殘舊,而頻密練習亦會因手汗侵蝕加速生銹,除左影響手感、阻礙手指移動速度等技術問題,舊弦亦有損音色、清晰度、彈性下降引致「痴fret」雜音...

彈幾耐先換弦?|如何保養?

換弦頻率視乎練習方式。以筆者 Yo 導師為例,雖未必每日練習,但因每次練習時間較長、或使用較多 slidebarred chord,令弦線生銹速度較快,平均每月換一次。建議多嘗試不同種類的結他弦線,以配搭不同歌曲加強演奏特色。如需要錄音,亦建議換新弦以確保較佳音質!

一般建議:每天練習,每月換一次;不經常彈奏的,最好每三個月換一次。

保養 Tips :

1)想維持好音色,換弦時最好一次過換哂整套,避免新舊/不同牌子的弦線混合而損害結他結構。

2)避免結他受陽光及濕度影響,應擺放於結他盒/袋內,內放防潮包保持濕度 45-55 %

3)如果不經常使用結他,建議鬆掉所有弦線,減低 tension 對琴身的負荷。

希望大家睇完由今日開始好好保養結他,下集繼續拆解各種結他迷思,請密切留意!

Photo from freepik.com


結他伴奏心得|三首結他伴奏編曲分享(上)

引言

相信彈開結他既朋友,聽歌時如果聽到結他編曲都會特別有興趣。然後發現,點解我上網搵譜彈同原曲爭咁遠既?學識執歌後,終於有能力彈到!下面私家分享3首用結他編曲既歌,同大家剖析下每首歌既編曲重點!

許廷鏗|你可能未必不喜歡我

呢首係 E 調既編曲,雖然有 4 個 #,chord 睇落會相對難彈,但其實加少少心思,易彈左之餘仲會創造到新既 voicing。而呢首歌既木結他編曲就用左其中一個常用既 idea - 利用 1、2 弦空弦作為 pedal note。例如 I、IV、V、VI minor 都有用到呢個 idea。

過渡之間|起伏流暢

除左用 chord 外,分明既段落層次都係值得參考既地方。由 intro 到 1st chorus,都係用 fingerpicking 去表達,直到去 bridge 就開始用strumming 去表達,而且有 32 分音符,更能突顯整個段落氣氛。到 2nd chorus,突然轉返 fingerpicking,之後再用 strumming 去帶起最後一次 chorus,整個起伏做得十分流暢。伴奏可以參考我既 cover(https://youtu.be/3xU0WwVry6E

Photo credit to Alfred's Facebook

Bread|If

跟住落黎介紹一首平淡但非常經典既結他編曲。拍子唔複雜,只用上連續既 8 分音符。但 chord 就十分值得學習。歌曲用 A 調編曲,A 調和 E 調一樣,其中一個慣用手法是利用 1、2 弦空弦作為 pedal note。所以接近整個 A 段的和弦,都有 1、2 弦空弦存在。

伴奏編曲|利用空弦

而當中高把位 chord shape 配合 1、2 弦空弦,就會帶來新聲音。原因有以下三個:
1. 空弦音不是原和弦的組成音,改變和弦的種類。
2. 原本結他彈 broken chord,慣常會聽到由低音至高音,但利用空弦後,可以由高音去低音再去高音,令聲音脫離結他限制。
3. 空弦音可能和原本的組成音為同一個音,兩個相同音在兩條線上同時發聲,會產生特別的共嗚。

最後值得留意的是,A 段和弦除了利用 1、2 弦空弦作為 pedal note,亦用了 5 線空弦作為 Bass pedal note,所以每個和弦轉換的音不多,有種好像有轉,又好像沒有轉 chord 的感覺。

Photo from mentalitch.com

林宥嘉|我總是一個人在練習一個人

一支 strat 加 clean tone 為主既編曲,加埋林宥嘉把聲,孤獨既氣氛出哂黎。呢個編曲有樣野好值得學,就係編曲唔一定係加野,有時可以諗點減野。聽聽入面既和弦,其實好多時只係彈3粒音,而可能本身個 chord 係有 5 個組成音既。其實唔一定下下都需要㩒曬所有音,反而好似呢首歌咁,只係用色彩最強既音已經足夠。

加或減?|和弦音的取捨

相似既例子仲有Justin Bieber既 《Love Yourself》同鬼怪OST《Stay With Me》。更何況,結他只有6條弦,如果遇到6個音或以上既和弦,我地都要識取捨,揀比較重要既音出黎,而唔係每次都諗點樣㩒曬。

Photo from Yoga Lin Facebook