結他教室|學結他常見嘅卡關位(5-7)

學結他常見嘅卡關位(5-7)

如果你已經克服《學結他常見嘅卡關位()提過既四個難關,恭喜你,你已經脫離新手初學者嘅階段!睇返呢四個關於技術原因而卡難嘅解決方法。今次就黎到中篇,會傾下一啲進階啲既初學者所面對嘅問題。

Photo by Andrew Ly on Unsplash

 

樂理好難啊!|結他學齡:半年

你知道樂理很重要,但又好怕去學,覺得麻煩同悶? 但無學樂理,你彈嘅只係結他;學左樂理,先算係玩音樂嘅開始!你有無咁嘅經驗?剛背完譜一個月後,只記得一半,三個月後就完全忘記啦。這情況好似背書一樣,無理解過句子嘅意思,當然會背得痛苦。樂理,其實係音樂上嘅文法同語法,無注意樂理,又點彈出好東西呢?所以,我地既課程會隨着學生的技術既進度加入所需要嘅樂理知識,目的是令到每個學生最終都有能力編到有質素嘅結他Fingerstyle。你想唔想有一日可以唔洗睇譜彈奏?想唔想試下編一首自己鐘意、坊間又無譜既歌?如果想,就要好好對待樂理。

Photo by Jeswin Thomas on Unsplash

我仲有咩可以學?|結他學齡:九個月

基本技巧,已經練得唔錯,拎到份樂譜可以彈得似模似樣,但係可能會有種空虛感,呢種空虛可能係缺乏清晰嘅學習方向。音樂,甚至結他都係一個好大嘅世界,一定有更多技術和知識你可以學。要有心理準備,你投入嘅時間和努力會比之前更多,但亦會得到更大嘅滿足感!! 

你有兩個大方向可以去學習。
一、樂理:音程、大小調、五度圈、和弦理論、其他音樂風格等。學習樂理同時,其實都訓練你耳朵和對音樂嘅敏感度。練耳由拍子開始,拍子>旋律>音程>和弦等,全都離不開對樂理嘅認識。在結他上應用樂理嘅知識,例如:音程係結他上係點表達嘅,不同調嘅旋律會在哪裡找到,一啲特別嘅和弦進行套用在不同調上可以點彈,如何為和弦增加extension等。
二、你可以向更高深嘅技術發展。percussion技巧,可以係彈奏和弦和旋律嘅同時,加入㪣擊節奏。同一支樂器可以同時做到Percussion和彈奏效果,只有木結他可以做到,亦係木結他近二十年來最多人研究嘅技巧。可以多學習幾位出名嘅木結他手包括Andy Mckey、押尾光太朗、松井祐貴、鄭晟河等Percussion結他嘅好手。

Photo by marianne bos on Unsplash

支結他唔好聽喎!|結他學齡:一年

好既技術同好既結他比,一定係追求好既技術優先。但係有一支唔好聽嘅結他,你每天嘅練習係磨練;好聽嘅結他,你每天嘅練習就係享受。所以對自己好少少,買一支好㩒,又鐘意既結他,都係一種好既動力黎架。而且你係結他上面嘅投資其實係同你要學好結他嘅決心係成正比嘅,想像下如果你未來五年都會每日彈結他,你當然想佢音色好啦,如果當結他係你終身伴侣,就更加不用多講。而跟據我地哈利店長報告,我地嘅學生係買結他嘅時候會比坊間嘅客人預算會較高,第一當然係因為佢地既決心。第二就係因為一支音色好嘅結他會誠實地反映你嘅功力,音色既掌控,有無多餘嘅動作發出怪聲。好嘅結他就可以如實反映呢d細節,對你嘅技術會有好大嘅提升!

結他=伴侣|揀一支最配合你嘅好結他

好嘅結他首先要有良好嘅共鳴。木結他結構有三個等級,分別係全夾板、面單(solid top)和全單(full solid)結他。當中,全單板結他嘅共鳴係最好嘅。但唔代表全單板共鳴,就一定比面單結他好,經過精確調音嘅面單結他,會比無好好調音嘅全單結他音質來得更好。由音量、延音長度、聲音分離度等可以判斷結他嘅共鳴。有足夠嘅共鳴,就可以發揮木材原本嘅聲音。有啲木材會比較puchy,例如:cocobolopauduk,較柔和嘅有rosewoodwalnut,聲音更清澈。結他嘅聲音,就好似唔同嘅個性,要配合你自己嘅個性、使用習慣。擁有一支心愛嘅結他,絕對會增加你每天練習嘅動力!

今次就講埋一啲進階初學者會面對嘅難關,其實學結他卡關位都講得7788啦,「吓!?中篇咋喎?咁快講完,小編趕收工啊?!」um...我諗如果你已經解決咗以上既難關,已經證明咗結他對你黎講一定好重要,你需要嘅係時間嘅沉澱同磨練,小編都係努力中,就唔俾更多意見啦。而下篇會提到一啲屬於心態同個人原因嘅難關,純屬分享,有興趣嘅朋友可以期待一下。我地下一篇再見~

Photo by Daria Shevtsova from Pexels

 


結他教室|如何選購適合嘅弦線

每堂必答|買乜牌子好?

入門班嘅同學好多時都會問結他線買邊一隻最好?記得我都仲係新手都一樣,入到去十多個牌子,唔同嘅物料,然後又有不同嘅號碼,根本花多眼亂,最好唔好煩,你話比我聽邊隻好我就買邊隻,但係其實都要了解下你鍾意嘅音色同你手上枝結他適唔適合嘅,唔係上錯線都可以好大鑊。講點選購前,我地可以講解一下結他線上嘅包裝資訊,包裝上面一般都會顯示:唔同弦線嘅粗幼、包覆物料,以及係唔係 Coated Wire。呢幾個資訊都係選購時需要考慮的,而我都會逐一詳細講解佢地嘅分別。(咪玩啦!最緊要其實係價錢牌! >_<)

Photo from Themusicworks

弦線粗幼|乜會影響音量架?!

市面上大部份嘅弦線粗幼基本分 4 個等級:Extra Light、Custom Light、Light、Medium,一般都以第一線去區分,0.010為 Extra Light、0.011 為 Custom Light、0.012 為 Light、0.013 為 Medium,而相同既第一線,不同嘅品牌會有不同嘅配搭,以 Elixir 同  Martin 嘅 Light 為例,Elixir 嘅組合係 0.012 0.016 0.024 0.032 0.042 0.053,而 Martin 嘅組合係 0.012 0.016 0.025 0.032 0.042 0.054,所以同一個等級不同嘅牌子都有不同嘅音色,不同弦線嘅粗幼到底點影響結他手感和音色?詳細可以睇返《阿峰扎記 #3|同學仔,你買啱結他弦未?》

小編自己一直用開 Light,好似彈《月球上的人》我就會揀 Medium,因為每提升一個級別嘅粗幼,弦線嘅 Tension 會提升大概 10 %,音量自然會提升,從而令低音部份較結實,但考慮到結他嘅壽命,平衝手感及音色,Light 一直係我嘅 1st choice。

Image from martinguitar.com

鋼材物料1|知唔知你用緊嘅係咩線呢?

結他線嘅鋼材物料聽得最多就係 80/20 Bronze 同 Phosphor Bronze,其實仲有其他製造物料,分別係 Silk & Steel 同 Nickel Plated,但因為唔算主流,所以市面上都唔易見。咁到底大家又知唔知所指嘅物料係邊 part? 唔同物料嘅音色又係點? 講之前先解構弦線嘅結構,大家可以望一望你枝結他嘅三四五六線同一二線嘅分別,一二線結構好簡單,只係一條金屬線,然後再望下三四五六線,佢結構複雜少少,好明顯見到一圈一圈嘅金屬線。其實三四五六線係由金屬線包覆住弦芯,而 80/20 Bronze 同 Phosphor Bronze 就係指呢外面包覆住弦芯呢層,而唔係指整條弦線。80/20 Bronze 指物料由 80% 銅同 20 % 鋅嘅合金組成,顏色偏金色; Phosphor Bronze 則由 92% 銅同 8%嘅磷同錫嘅合金,而呢款因為銅比較多,顏色偏向玫瑰金;Nickel Plated 指銅線表面鍍上一層鎳,所以佢係銀色(鎳咪就係平時鍍係耳環上嘅金屬);而 Silk & Steel 指鋼線作包覆物料,但與弦芯中間包多一層絲線,都係銀色嘅。所以快快望下你枝結他用緊咩顏色嘅線,睇埋落去判斷自己到底適唔適合用呢種線(自己當然生哂銹變哂色我就幫你唔到了)。

Image from BCA chemistry

鋼材物料2|今次真係識條鐵

作為主修化學嘅結他手,我可以話你聽,不同金屬嘅硬度及延性都係唔同,所以唔同嘅鋼材物料對音色都會有好大嘅影響。Silk & Steel 因為中間夾左一層絲線,所以係咁多種物料當中,佢嘅張力係最低,上面就提到張力同音量嘅關係係成正比,所以音量相對較低,音色同古典結他相似,音色唔太適合做 Strumming 呢類。Nickel Plated 、Phosphor Bronze 及 80/20 Bronze,呢三種線以 80/20 Bronze 嘅音色最明亮,最適合做 Strumming;Nickel Plated 音色最溫暖,用黎彈”小天使”呢類嘅慢歌一定可以將氣氛帶出,但低音力度輸出較低;Phosphor Bronze 剛好係兩者嘅平衡,有溫暖嘅音色同時又平衡到低音嘅力度。總結以上,必需考慮你嘅演奏風格,再決定邊一款弦線最適合自己。

Image from Stringbymail.com

包覆技術|弦線嘅續命丹

前面提到結他線係由金屬造,細個唔需要讀過 IS (綜合科學)都知道金屬就一定會生銹,結他線都一樣,尤其製造弦線嘅主要金屬-銅。金屬最大嘅敵人係水同氧氣,彈結他一定會出手汗(唔信你望下你掂得最多嘅頭三格),同埋弦線同空氣接觸都會令結他線生銹,所以結他線嘅壽命一般只有兩至三個月(其實最尾兩個星期都係死頂唔換線)。有見及此,好多廠商都會用唔同方法增加壽命,例如鍍其他氧化速度較慢嘅金屬上去、又或者利用一種包覆技術係條線上面做一層薄膜,即係”包膠”。呢個方法係十分聰明,能夠大幅延長結他線嘅壽命,但因為金屬物料改變同薄膜影響弦線振動嘅傳送效率,從而影響音色。雖然會影響音色,絕對係易出手汗用家又或者懶惰用家嘅恩物,所以都深受大眾嘅歡愛,絕大份品牌都都有出呢類 Coated Strings。睇到呢道一定以為換左 Coated Strings 就保用一世唔需要再換?答案當然唔係!因為呢層 Coating 好薄,太厚就會阻到弦線振動嘅傳送效率,大家一路勾線係會造成表面層 Coating 損耗,空氣都依然有機會接觸弦線令佢氧化,都係要換的(T.T)。

Image from Elixirstrings

總結|好弦線=粗幼 X 物料 X 牌子 X 保護

所以,選擇弦線時,記住呢個口訣:”最適合你既弦線=粗幼X物料X牌子X保護” ,決定手感同音色既平衡去考慮就唔會有錯。最最最重要係大家必需要定期為結他換上新嘅弦線(最離譜聽學生分享佢彈左咁耐無換過線),弦線老化會影響音色,音色同手感變差絕對影響練習質素,老土講句:工欲善其事,必先利其器!

photo from madeit.com


結他教室|學結他常見嘅卡關位(1-4)

學結他常見嘅卡關位(1-4)

無論你係音樂上嘅新手,想學結他去認識異性同你一樣喜歡音樂嘅朋友,返工返學之餘想培養新興趣,抑或你已經學左結他一段時間,覺得無乜進步嘅朋友,小編係呢篇文嘅上下集入面歸立左一啲自己同學生係學結他過程中,會面對嘅阻礙,同埋一啲過關嘅小貼士同心得,由淺入深,希望幫到大家。

Photo from PxHere

手指好痛,彈唔到落去!|結他學齡:1個月

誠實地講,呢個過程係每位吉他學習者嘅必經階段。尤其練習slide技巧,隻手指尾好似會俾條線切開咁!但請相信我,持續練習大概三個月至半年,手指頭就會自然起繭,再彈奏歌曲就會舒服非常多!第二,你手上嘅結他會唔會弦距過高? 弦距過高時,你需要使用更大嘅力量去按線。如果唔確定你結他嘅狀況,請搵專業人士檢查同setup你嘅結他。

Photo from PxHere

我轉Chord好慢,我係唔係無天份?!|結他學齡:3個月

多數初學者尤其係自學者係轉Chord嘅時候會逐隻手指按係指板上面,咁樣會非常慢,而且仲會影響你既節奏。如果你係youtube上面,用0.5倍速,播放結他手轉chord時嘅動作,你會發現轉chord應該係所有手指同時提起、同時按下。我地創辦人阿峰稱這技巧為「倒模理論」,意思係將chord嘅形狀,練成一個個「模」(肌肉記憶)咁印落去。峰弦峰語係頭兩個月嘅入門班,已經有根據呢個原理而制定的課程同練習,等學生可以打好基本功。

Photo by Khan Fahad form PxHere

Barred chord 點㩒都唔實,隻手好攰啊!|結他學齡:半年

Barred chord係其中一個初學者最大嘅障礙!但亦有啲方法可以令你更容易,按好Barred chord。但首先,結他係咪弦距適中? 弦距過高,就要用更大力先可以將Barred chord按好。如果係結他問題,就要快啲搵專業人士檢查,調整。以下係幾個按好Barred chord嘅技巧:

  • 如果你練習後發現凹痕係在食指正面,就要改正手指角度,要用食指側邊bar
  • 因為Barred chord時嘅第一、二線比較難按好,所以你可以稍微移動食指,利用食指第二個關節嘅指側,按實第一、二線。
  • Barred chord時,姆指只係輔助,用力嘅地方其實係靠左手踭靠近身體,然後向後收。同時,配合右手夾住吉他身。
  • Open chord唔同,Barred chord係唔同嘅格數會有些微分別。而且,五線或六線BassBarred chord係獨立嘅。所以練習時,你幾乎要當不同位置嘅Barred chord係一個新嘅和弦,唔同嘅「模」練習。

Photo from PxHere

練極都彈得唔好聽|結他學齡:半年

有啲初學者,可能已經學左一段時間,彈過了一定數量嘅譜,但係彈得再多,總係覺得自己彈得唔夠好聽。如果只係能夠依譜彈奏,其實並不足夠。要讓你嘅結他彈出好聽既音樂,其實有幾個細節要留意。

  • 節奏感,留意一下你彈嘅歌係4/46/8或其他拍子。當你彈奏(無論係掃chord或係fingerstyle)時,要強調重拍嘅地方例如第13拍,放輕24拍,而且要跟隨不同嘅段落嘅起伏,製造動力及節奏感。
  • 尤其係彈奏fingerstyle時候,留意你左右手有無過早或過晚,接觸或離開弦線,令你嘅旋律斷斷續續。
  • 好多學生彈錯時,會突然停低,再重彈。彈奏時,請專注於你想表達嘅音色、旋律、下一個和弦等。如果彈錯,唔好怕,跟住節拍,繼續彈,保持歌曲的連貫性,流暢嘅表達。
  • 記得呢句說話:好嘅音樂唔係有幾難彈,而係對於細節嘅完成度有幾高!

Photo from PxHere

以上係四個係初學者好快就會面對既難關,同少少心得。下一篇會講下一啲中階學生會面對既困難。

Photo by form PxHere

 

 


阿峰扎記 #3|同學仔,你買啱結他弦未?

《阿峰扎記》|峰校長的每周筆記

據史書記載,自峰掌門自創立本門派後,未敢有忘昔日讀書時刨 Journal 的習慣
日子有功,滴水穿石,累積了大量結他冷知識,秘聞,趣聞,奇聞,新聞,正史,野史,八掛等
命名為 《阿峰結他扎記》,簡稱《阿峰結扎》,及後為免妨礙峰校長開枝散葉改稱為《阿峰扎記》

5個%|缺一不可

上回提要,好嘅結他就好似一班精通玩“以訛傳訛”嘅同學一樣,能夠喺傳遞故事(能量)嘅過程中盡量減少流失,務求達到最真實嘅還原(轉化成嘅音色);但同時亦都唔好忘記,根據外國研究,其實以物理學嘅角度講,結他嘅能量轉換(由弦嘅勢能輸出至聲能)其實只有大約 5%!

傳奇日本結他手押尾光太郎嘅御用制琴師 John Greven 都曾經係一篇 Journal 提到,如果因為某啲嘅部份/組件接合得唔夠好損失咗 1%,其實亦係等於損失咗最終整體輸出音量的 20%!一齊黎高呼(Go through)一下每個部份,話唔定有啲 DIY 嘅項目,可以令你立刻提高結他嘅效率!

左圖為 John Greven

第一招|買啱弦線 = 提升效率

冇錯,最快嘅方法就係買一包拉力(Tension / Gauge)較高嘅結他弦,因為拉力較高,相對能輸出嘅力量會較大;坊間來說接拉力大約分四種:Extra Light(俗稱 0.010 ),Custom Light(俗稱 0.011 ),Light(俗稱 0.012 ),Medium(俗稱 0.013 ),如果你覺得結他的音量不夠,其實換大一級拉力,分別就很明顯了。

註:0.01X” 呢個數值,係指最幼嘅第一弦嘅橫切面嘅直徑,並以 inch 做單位。

不過要留意,所有事情都要等價交換的。換大一級拉力,意味著弦芯較粗,同時亦需更大嘅力度令佢變形。即係話,會難㩒咗,同時你亦可能覺得會痛咗。

音量大固然好|小心等價交換

一般來說,我建議大部分有一定程度嘅男女同學都用 Light。有些女同學話:”我怕痛,朋友建議我買 Extra Light 喎!”;這個說法其實也沒有甚麼不妥,不過我個人意見係,其實學結他,適當哋感到手指頭痛在所難免,關鍵係弦距係唔應該影響你彈琴嘅表現,以及你嘅所受嘅痛苦,係合理範圍內。

有些同學的結他弦距過高而又不曾 Setup ,甚至用 Extra Light 也會覺得痛;而有些結他經 setup 後,也可以做到甚至按 Medium 的弦也毫不吃力。

所以我認為最正確嘅做法,係要將結他先去檢查和 setup,確保你受嘅痛係合理嘅範圍內,而不是一開始就選擇 Extra Light,以手感犧牲音量,或者一開始就買過大拉力嘅弦,為得到音量然後白白受苦。

買粗弦留意|你支結他受唔受得住?

提升效率當然好,但同時也要小心,有啲結他嘅琴橋係受唔到呢一份拉力,例如美國四大手工琴之一 Bourgeois 最為著名嘅型號 Soloist 所配的 “金字塔式琴橋” (Pyramid Bridge),講明最多只能用 Light 的弦線,否則可能破壞結他! 同樣地,如果在 setup 得接近物理極限的結他換低一級的拉力也可能會做成痴 fret!(打品,Fret Buzzing,彈奏是出現金屬撞金屬的雜音);或者因為弦線的受力角度太少而影響音色。

所以總結一下,大家如果經驗不足,換拉力之前,最好還是帶備結他咨詢一下可信賴的木結他維修技術人員(峰弦峰語學生們,歡迎你哋帶結他返黎俾我哋望望)。下一章,我哋將會講下咩叫下枕(Undersaddle)!

Cover Photo by Brett Jordan on Unsplash


阿峰扎記 #2|好嘅結他,就係以訛傳訛嘅高材生

《阿峰扎記》|峰校長的每周筆記

據史書記載,自峰掌門自創立本門派後,未敢有忘昔日讀書時刨 Journal 的習慣
日子有功,滴水穿石,累積了大量結他冷知識,秘聞,趣聞,奇聞,新聞,正史,野史,八掛等
命名為 《阿峰結他扎記》,簡稱《阿峰結扎》,及後為免妨礙峰校長開枝散葉改稱為《阿峰扎記》

想像一下|一班分成兩行嘅同學

上回提要係:原來我哋細個玩開嘅以訛傳訛,竟然係木結他發聲嘅最基礎原理?

冇錯。我哋假設一下,結他嘅所有部份,就係一班分成兩行嘅同學,而你就係老師;當你講咗一個故仔(勾弦)俾呢兩行嘅第一個同學仔聽(下弦枕及上弦枕 ),佢哋就會將呢份個故仔(動能)一直傳落去,直到最後每行最後果兩個同學仔(面板/側板及背板,即共鳴箱)合作講返呢個故仔出黎(聲能),亦即係我哋一直以黎熟悉嘅結他聲。

左圖為電影 《The School of Rock》 劇照

好嘅結他|以訛傳訛嘅高材生

好嘅結他,我哋可以想像為精通呢個遊戲嘅一班高材生:傳送得快,同時又傳送最多及最低失真嘅能量,我哋可以稱之為高效率嘅結他。同時亦都解悉到點解有得結他會大聲啲,又點解有啲結他會延音長啲,結實啲,一切都同能量嘅多少有關。如果只有靚聲,而效率很低,咁呢一把琴只係一把自私嘅琴,聲音好好,但就得你一個聽到囉。

Photo by Dmitry Ratushny on Unsplash

只有 5%|任你驚為天人

咁即係好結他,就可以傳送出 100% 嘅能量化為聲音呢?抱歉,由於結他嘅物理限制關係,其實好多力量都喺傳送嘅過程消失咗,就好似你會你感覺得結他嘅震動,所以有很大部份會去咗動能,並散失為熱能。根據外國關於弦樂樂器嘅研究顯示:結他動能轉化成聲能嘅效率,大概只有 5%,亦即係話,任你個個同學仔都係記憶力驚為天人,其實最後,成個故仔只係得 5% 係真嘅。

既然得返 5%,咁究境點樣可以將呢 5% 發運到最好呢?下一集我哋會講下各自嘅結構到底分別嘅作用係點運作,想唔想知換咩小配件可以令到能量可以保存到最多?下期再續。

Photo by Ryan Johns on Unsplash


阿峰扎記 #1|咩叫做好結他?先要識玩以訛傳訛

《阿峰扎記》|峰校長的每周筆記

據史書記載,自峰掌門自創立本門派後,未敢有忘昔日讀書時刨 Journal 的習慣
日子有功,滴水穿石,累積了大量結他冷知識,秘聞,趣聞,奇聞,新聞,正史,野史,八掛等
命名為 《阿峰結他扎記》,簡稱《阿峰結扎》,及後為免妨礙峰校長開枝散葉改稱為《阿峰扎記》

前言|致好奇的你

呢幾年有時我教教下班,都會忍唔住分享一啲結他嘅冷知識,有時仲會講到超晒時,其實我嘅知識係邊度黎呢?大概就係呢幾年開始重拾返當年讀 PSY 嘅習慣:刨 Journal。當中包括製琴師嘅,科學嘅,甚至一啲歷史上嘅資料,日子有功,筆記都抄滿咗兩本。有唔少同學仔建議話”聽唔切,不如你寫返專欄啦(其實以前受某青少年刊物邀請,寫過十幾期)”。我話今時今日仲有人睇啲咁悶嘅嘢咩?我感覺連連載懸疑小說都冇咩人追(其實可能都係寫得悶)。

然後竟然有同學話:我就係睇咗幾年前你寫落果篇所以黎學(平和貴結他分別到底在哪裡)。你唔寫,又點對得峰弦”峰語”呢?咁我又 buy 果位同學仔嘅,就算冇咩人有興趣,咁咪當自我調整一下心態囉,滿足一下少數有足夠耐性睇字嘅朋友之餘(總有學結他嘅朋友有同我一樣嘅求知慾),又當係幫自己複習一次,助人自助,win win。

講完廢話,開波。

以訛傳訛|越離題越好玩

早兩星期返左同班中同一齊返左學校,令我諗起我以前係學校玩過一個遊戲:全班每行坐第一排嘅同學出去聽老師講咗個故仔,然後返埋位,細細聲傳俾坐後面嘅同學,直到最後一排嘅同學。然後每一行坐最後同學就企喺身講返個故仔出黎(通常大家最後都離晒題),睇下邊個講得最似原著就算贏。以上嘅情節大家都好熟(車,咪係以訛傳訛”囉),仲可能玩過好多次,之不過,你又知唔知,你支結他其實每日都玩緊?

作為重新執筆嘅第一章,等我用一個稍為科學嘅角度,同大家重新分析一下咩叫做好嘅木結他。

Photo by Ben White on Unsplash

LEVEL OF EFFICIENCY|效率,等於一切

要評價一支木結他好唔好,首先要了解結他嘅效率 (Level of Efficiency); 而要了解效率,首先要知道咩係能量,同埋能量轉換(Energy Transfer) 啦 。簡單黎講,其實由你彈一條弦,到你聽到聲音,能量就已經喺結他入面經過每一個部份不停轉換。

由你手指壓/勾弦的一刻, 能量會隨住弦線分兩個方向流動:

1. 弦(勢能=轉為=動能) > 下弦枕 (Saddle) > 琴橋 (Bridge) 及弦釘(Pins) > 面板 (Top) > 音樑結構 (Brace Structure) 及 背板側板(Back / Side) > 聲音 (動能=轉為=聲能)

2. 弦(勢能=轉為=動能)> 品絲(Fret) 及上弦枕 (Nut) > 指板(Fretboard) 及琴頭(Head) > 琴頸 (Neck) > 音樑結構 (Brace),面板 (Top) 及 背板側板(Back / Side) > 聲音(動能=轉為=聲能)

沒錯,木結他嘅發聲原理就係一次”以訛傳訛”。實際情況係點?咁係咪要有 100% 嘅效率先叫做好嘅結他?下集繼續。


冷知識|淺談中國風:由《周禮》到周杰倫

淺談中國風|何謂五聲音階?

圖片節錄自周杰倫《紅塵客棧》MV

 

中國風其實也蠻容易辨認的,除左會有中樂作為背景,最重要就係 “無法無天”(無f無t),也就是使用五聲音階,Pentatonic Scale。最早出在《周禮。春宮》
簡譜:1,2,3,5,6
唱名:d,r,m,s,l
中樂:宮,商,角,徵,羽
為甚麼呢?說起來,就要從古時中國人學音樂說起了。

三分損益法|你的數學荒廢了嗎?

小弟不才,翻譯一下:古人以敲竹為樂,但是怎樣去得知竹的長度要多長,才能找到自己想要的音呢?

原來在春秋時,已有一套較科學的方法計算了:就是先以一跟長度單位為 81 的竹作為“宮”音 (d), 減去三份一後,81-27=54,也就是“商”音(r) ,

再用商的長度為準則,加上1/3,也就是 54+18=72,得出“角”音(m),
再用角的長度為準則,減去1/3,也就是 72-24=48, 得出“徵”音(s),
最後,再用徵的長度為準則,加去1/3,也就是 48+16=64,得出“羽”(l),

如此,你只要集齊這五根長度不一的竹管(81,72,64,.54,48),就能學古人一樣敲竹為樂了。而當中因為這五個音的來源,又產生了不少的故事啊。

現在來說,只要運用d, r, m, s, l 這五個音得宜,你也能創作一首有點中國風的歌呢!
大家聽聽,在紅塵客棧,還是青花瓷中,也就是這樣的。在學結他的朋友要留意了。