陶喆 / 愛很簡單 Guitar Fingerstyle [Tab]
愛上很簡單愛下去很難
陶喆 / 愛很簡單Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Furch Guitars Yellow Deluxe Gc-CR
Tab / funguitar.pro
黎緊呢一年,應該會開始重新編返一啲過往嘅作品。《愛很簡單》呢一首歌做個起點都唔錯。
諗起呢一首歌,唔知點解諗返起幾年前,幫一個大同求婚就係用呢首歌。佢喺個沙灘上面拎住支結他自彈自唱(我負責拎相機啫其實),然後單膝跪地,當然係成功啦。好記得當日在場所有人都好感動,而佢地嘅婚禮都好順利完成。好似就係當時,我錄過一首《愛很簡單》俾佢。只係有樣嘢我哋所有人都估唔到:童話式嘅起點,未必會有童話式嘅結局。因為就係我打緊呢篇文嘅時候,佢哋各自都已經有自己嘅家庭(當然我唔會話你知個過程很難看)。
咁到底愛係簡單定係唔簡單?我喺編呢一首歌嘅時候,有少少啓發想同大家分享一下,純粹吹水切勿真。
話說當初有重新編曲嘅時候,都係想編得易啲。咁我諗住編 C Key,Drop D,頭三格,難極有個譜啦?應該好快搞掂啦?結論係我都搞咗成個星期。咁當然我好想賴落去中咗 COVID 未回氣啦,但實情係,其實過程中我都成日 ban 自己,例如唔想重覆以前嘅手法。改下改下又將頭三格,推咗一半上咗中把位。喺你追求完美嘅同時,先會明白,首歌上手仲係容易啲,難咗嘅係自己嘅標準,以致其實就會一路錄一跟出現一個妥協嘅過程。今次妥協度咪錄咗首歌出黎囉,下次呢?或者總有一次唔肯再妥協呢?
呢件小件其實真係冇咩參考價值,只係我諗,其實《愛很簡單》呢首歌會唔會係想表達:愛上很簡單,愛下去很難。
2023 年情人節,祝大家長廂廝守。
I LOVE U 無法不愛你 BABY
說你也愛我 嗚
I LOVE U 永遠不願意 BABY
失去你
衛蘭 / 街燈晚餐 Guitar Fingerstyle [Tab]
情人節呈獻
紙摺鑽石戒指的秘密
衛蘭 / 街燈晚餐Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Furch Guitars GNc-4-CR
Tab / funguitar.pro
在 2013 年彈過的作品,十年後藉著情人節,有機會再用魚絲結他再 cover 一次,也希望重新為大家分享一個古老嘅故事。
從前有個位年輕人,想向一位美麗的姑娘求婚。於是,他送她一隻紙摺的鑽石戒指。坦白說,姑娘對這位窮小子也有好感的;但現實是,紙摺的東西,太兒戲,太不矜貴,經不起時間的考驗。所有人,甚至連她自己,都覺得這段愛情,是不值錢的。
最後,姑娘選了一個富翁,戴上的真正的鑽石戒指進入教堂。
過了十多年,在別人眼中,她已經很富有,稱得上是雍容華貴,可惜是,幸福不曾光顧姑娘嫁進的豪門。好像生活在一個囚籠裡,無論如何都逃不出去。她才發現,她過的生活不是她想要的。就在一天她閒著沒事的時候,想起那紙戒指,一時興起,她決定把它拆開,學學摺鑽石的方法。就在打開的一剎,一樣東西掉了出來。姑娘看著,倒抽一口氣,心臟幾乎漏跳了一拍。
裡面藏著的,是一顆閃鑠的,比起富翁當時求婚送的還大的鑽石戒指。
故事很短,也沒有甚麼很大道理。或者只是一個提醒:有時,我們想要的幸福,未必是別人由送的;很多時,是靠自己克服考驗,通過試煉而來的。
原本,在街燈晚餐的問題是:愛情,抑或面包重要?
現在,不妨問自己一個問題:安定,抑或幸福重要?
PS. 彈完呢首歌非常滿足,很有和自己十年前對話的樣子。希望今年可以有時間一直做這些 Re-arrangement 就好了。
難道是為了安置未來才愛你誰要計算過安享晚福便一起
說到底 我暫時受不起 愛別忘麵包
那些道理 只想去成全自己
宇多田光 / First Love Guitar Fingerstyle [Tab]
最揪心的作品
一秒鐘就能讓你穿越時空
宇多田光 / First LoveGuitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Furch Guitars Red Deluxe Gc-LR
Tab / funguitar.pro
我覺得,能夠用呢首歌去作為我 2022 嘅年度之作,實在太感恩,太幸運。我好似真係好耐未有咁充滿動力去完成一首歌。唔計離開香港前錄下嘅 demo,返咗黎後我諗我加加埋埋好似錄咗過百 take 先,先揀到呢個版本。
當然 Netflix 嘅出現剛剛好啦,但其實我好幾年前已經諗,如果我人生中要認真彈 First Love,一定唔可以彈人哋Cover,必定要由我出自我手,親手完成嘅作品(如果有一日我出譜集 CD,相信我,我真係毫不猶豫就擺呢首歌入去)。
彈呢首難度(對了樂譜在 funguitar.pro),我覺得唔係技術層面,而係因為唔只一個人講過,呢首歌係有一種超能力,可以令你聽完前奏已經眼泛淚光。以至我認為彈呢首歌最難嘅地方,其實係 capture 佢嗰份由揪心嘅思念,直到你知道已經無可挽回嘅難過。帶住呢份情緒黎細味呢首歌,先可以好似《初恋》一樣,令你搭一趟九集嘅時光機。
最早感動到我嘅,應該係台灣指彈高手盧家宏嘅版本,當時我中三,已經覺得 A Key Arrangement 好感動(可以話係其中一首我嘅啟蒙作品,當時資源冇而家咁多,我真係日聽夜聽),及後當然係有無人不識嘅押尾光太郎嘅版本。要編一個由香港人出品嘅完整版 Fingerstyle Arrangement,大家未必明白,但其實背後好大壓力。
錄完好想講一句自己太幸運,好好彩阿媽冇生到我係一個容易放棄嘅人。當然更好彩嘅係,學生冇再 send 余文樂同埋張繼聰俾我。
最後,希望大家我嘅版本嘅《First Love》。
You are always gonna be my loveいつか誰かとまた恋に落ちても
I'll remember to love
You taught me how
韋禮安 / 如果可以 Guitar Fingerstyle [Tab]
那七天,我很快樂!
韋禮安 / 如果可以Guitar Fingerstyle [With Tab]
Fingerstyle Arrangement / Long Fung Tam
Text / Long Fung Tam
Guitar / Dowina Guitars Sauvignon Spruce GA.
Tab / funguitar.pro
話說上年十二月趕唔切封戲院之前睇 《月老》結果一路都冇咩感覺去構思下呢首歌。結果呢幾日睇完我腦裡面只有一句話:
那七天,我很快樂!
那七天,我很快樂!
如果可以 我想和妳回到那天相遇
讓時間停止 那一場雨
只想擁抱 妳在身邊的證據 吻妳的呼吸
一眨眼 一瞬間 妳說好就是永遠
林家謙 / 記得 Guitar Fingerstyle [Tab]
如果有一日我黎到彩虹橋接你
你會唔會仲認得我?
林家謙 / 記得Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Dowina Guitars Padauk GAc-ds
Tab / funguitar.pro
呢首歌,我係特登彈黎送俾一位學生,希望佢嘅小狗 Dolly 可以係彩虹橋嘅另一端,從此無痛苦咁樣生活落去。以我所知其實 Dolly 一直都好鐘意聽住佢彈結他。或者結他聲,都可以係令佢喺最後嘅時光得到慰藉。
早幾日都係 ig 問過大家一個問題:如果你可以同已經離開咗嘅小動物講一說話,你會想講啲咩?其中一個朋友嘅回應比較深刻嘅係,咁我就將呢一段 voice message 轉返做文字,希望借住呢首歌可以幫你轉達你嘅說話:
「由你半歲開始黎到我哋身邊,到早一排你離開咗。我哋全家都仲未好適應,每當走近門口,好似仲會聽到你嗚嗚叫我哋;落床嘅時候仲會覺得你會撲上黎;甚至你飲水隻碗我哋都未收走。
初頭以為你只係少少唔舒服,直到後來隨住你出入醫院嘅日子多咗,我先知道原來你就黎唔得了。望住你連最鐘意食嘅零食都提唔起心機。我都好心痛,忍唔住喊咗好多次,唯有喺你最後嘅日子用晒我全部時間黎陪你,用盡力去珍惜同你一齊嘅每個時刻。你仲記唔記得有一日我同你講話,我唔使返工啦,我哋日日去遊車河啦?跟住我哋去均好多你最鐘意嘅公園玩。我淨係想你知道,今生今世,你都係我囝囝。
你畢業生活愉快嗎?嗰邊有冇狗狗蝦你?如果有一日,我黎到彩虹橋接你,你會唔會仲認得我?」
請記得 誰有停留過
請記得 曾有一份愛存在
請記得留住感覺過渡在人海
我記得 熾熱曾盛放
鄭伊健 / 甘心替代你 Guitar Fingerstyle [Tab]
每個男人心入面
都會有一個“細細粒”
鄭伊健 / 甘心替代你Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Furch Guitars Orange OMc-SR
Tab / funguitar.pro
陳浩南同埋細細粒嘅故事,可能就算連冇睇古惑仔嘅人都知道;最經典一幕要數,當陳浩南眼睜睜睇住細細粒中槍,然後就響起嗰一首聽馬上勾起回憶嘅《甘心替代你》。
我哋冇陳浩南嘅經歷。但原來,每個男人心底,都會有一個“細細粒”。喺我哋最幼嫩嘅歲月,記憶中除咗一班豬朋狗友外,身邊一定有一個細細粒,佢見過你對抗呢個世界,亦見過你最幼稚嘅一面,你見過佢笑得最開心嘅樣,同時佢亦俾你整喊過好多次。你嘅人生重大決定,都有佢喺你身邊。
點點滴滴,你以為無關痛癢,卻早已圍繞四周,陪你笑,陪你哭,陪你走,陪你飛。佢塑造你嘅價值觀,由你傻乎乎到擁有全世界,成為你最大嘅動力。只係當時對於人生,我哋冇認真嘅概念;對於承諾,我哋冇負責嘅概念;對於緣份,我哋冇珍惜嘅概念。
“細細粒”相信,會等到我哋長大嘅一日。但最後,往往都等不到。因為佢估唔到,就喺佢悄然離開嘅嗰一日,先係我哋真正長大嘅一日。忽然醒悟先知道,佢已經因為我哋嘅幼稚受過很多苦;我哋先明白,冇咗佢,會係連喊都釋放唔到嘅痛。
太遲了,呢份心意,早早化成灰燼。唯一可以做嘅,就係淌淚,心痛,告別你。
好鐘意一句說話:可能每個男孩子,命中注定會遇到一個無法挽回的女孩,痛苦地失去過,才會成為真正嘅男子漢。她將會為你受傷,但佢嘅傷痕,會係你明天茁壯成長嘅養份。今日,如果你咁啱諗起佢,請喺心入面好好感謝佢;而如果有幸你嘅細細粒仲喺你身邊,記得好好珍惜佢。
仿佛天和地在挑選我跟你
如像我亦重遇了生死
難道只好淌淚心痛告別你
無法讓我此際替代你
陳卓賢 / 留一天與你喘息 Guitar Fingerstyle [Tab]
試下用呢首歌練右手嘅層次感
陳卓賢 / 留一天與你喘息Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Bourgeois Guitars Soloist (Long Fung Tam Sig.)
Tab / funguitar.pro
今年情人節好多人都約咗人,個個都約咗 Ian 。所以我都約埋一份,送俾大家,可能係今年二月廣東歌最浪漫嘅作品。
今次左手方面編得再簡單啲,大家專心啲練下個 touch 啦。另外大家如果有機會去彈下份譜,就會發現其他都好多 Detail 位置可以試下控制下右手嘅 Dynamic,例如勤力少少做多啲啲 Thumb Rest Stroke,咁樣又可以突出到低音嘅同事,亦都唔遮咗個旋律。當然再用多啲 Quick Arpeggio 就更理想。
咁當然,練到咁上下你都會發現,一切都係 Bourgeois 嘅魔力……
其實我只想 棲身一抹暖光
沒說出口 心聲可以釋放
曾是獨個苦惱徬徨
卻是你 留住得一天也耐看
許美靜 / 傾城 Guitar Fingerstyle [Tab]
和你有關的遺憾是我這輩子無法再整理的行李
許美靜 / 傾城Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Bourgeois Guitars DB Sig. OMSC 9224 (Customized for Riley C.)
Tab / funguitar.pro
呢首歌我彈黎,送俾一位我嘅好徒弟。祝你過到英國生活愉快,早日識到鬼妹,唔好太掛住我哋。呢支你走之前訂嘅 Bourgeois Guitars,係我搵咗好耐先搵到,真係有錢都未必買到嘅 Brazilian Kingwood(本身已經係罕有過 Brazilian Rosewood,呢一套紋仲帶一點波浪紋 ),為師已經幫你盡量開光,用黎彈呢首歌送俾你。
走之前我有問過你,點啊執好行李未?所指行李,大家心照啦。「有得未執好㗎咩?」又係嘅,人生在世,唔係每一件事都可以俾你好好準備,好好執捨,都可以俾你慢慢劃一個句號。
或者留低嘅遺憾,會成為另一種緣份?或者就係整定你要學識放低,一個無論如何都放唔低嘅一個人。
唔緊要嘅,只係需要記住,你遺下嘅行李,就如同你自己一樣,早晚都會俾另一個人認領,或者咁講,好嘅句號,其實唔使太大費周章,有時只需要幾句歌詞。
傳說中 癡心的眼淚會傾城
霓虹熄了 世界漸冷清
煙花會謝 笙歌會停
顯得這故事尾聲 更動聽
LISA / 炎 Guitar Fingerstyle [Tab]
轉四次調仲要計數高難度的鬼滅之刃主題曲!
LISA / 炎Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Bourgeois Guitars Soloist LSH Custom Long Fung Tam Signature Bearclaw Italian Spruce & Madagascar RW.
Tab / funguitar.pro
好啦好啦出啦出啦,掙扎咗好耐都係決定全首編晒,一念天堂一念地獄,全首同半首嘅難度唔係講緊一倍,係四五倍以上。譜同步上咗 funguitar.pro,歡迎挑機。
間中收到 inbox,有啲朋友都問點玩 alternative tuning,會問 tuning 使唔使出到咁盡啊?其實轉成四次調仲要計數,咩 tuning 計你唔死都練餐死。
生活逼人,但好彩我嘅字典入面,從來都冇“將就”呢個選項。
多謝 singb 係咁撐住我(其實日日同我講你好期待已經好,因為我真係一個唔鐘意令人失望嘅人),到你 cover 嘅時候我俾你揀,一係染黃個頭扮善逸,一係操大隻戴豬頭。
懐かしい想いに囚われたい
残酷な世界に泣き叫んで
大人になるほど増えてゆく
もう何一つだって失いたくない
何韻詩 / 勞斯萊斯 Guitar Fingerstyle [Tab]
從《勞斯萊斯》走到《大叔的愛》
何韻詩 / 勞斯萊斯Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Bourgeois Guitars OMSC Double X
Tab / funguitar.pro
隔了許久,又決定重新再編過呢首歌。諗起八九年前,第一次編曲用咗 Standard Tuning + C Key 硬爆一段高把位彈咗半首,而家用特殊調弦,終於做咗一個豐富嘅完全版。見證住自己開始步入大叔嘅年紀。
然後大家又有冇諗過,勞斯萊斯其實就係大叔的愛嘅前傳?
或者好多小朋友未聽過呢首歌,但如果你細心睇下歌詞,不難發現當日前人們為咗一份信念,每一步都係血淋淋,有血有淚,經歷咗好多痛苦同埋掙扎,受到好多嘅狠毒難聽嘅說話,先換到大家嘅接受,先會有今日嘅輕鬆搞笑嘅大叔的愛。
再彈一次呢首歌,除咗係完成咗自己八九年前未完成嘅一份心血之外,都係想再提醒自己,永遠唔好忘記前人嘅努力。或者有一日,當勇氣都會變成禁忌,總要記得自己曾經真摯地活過。
PS. 預計過支琴嘅性格真係好似佢主人,但我冇諗過會似成咁,Sinker 嘅溫,Double X 嘅厚,Ebony 嘅忠實,好似照住佢個性格砌出黎咁。