吳雨霏 吳哥窟|結他 Fingerstyle

用結他訴心事|你有屬於你的吳哥窟嘛?

《吳哥窟》歌詞將三角戀嘅內心掙扎,情愫倫理間嘅矛盾,寫得痛入心扉;歌曲旋律流露住哀傷,和弦襯托出空虛同失落。詞曲固然動人心弦,但以前聽呢首歌,始終唔明白同一個旅遊景點 — 「吳哥窟」扯上乜嘢關係。

直到咁岩早排開YouTube 自動播放,播住《吳哥窟 (ft 花樣年華)》呢個版本嘅MV。MV引用《花樣年華》戲中梁朝偉凝望電話時內心嘅獨白:「係我,如果我有多張船飛,你會唔會同我一齊走?」呢段耐人尋味嘅台詞令我隨即翻睇呢套講婚外情嘅戲。戲中最後一幕,梁朝偉向吳哥窟嘅岩洞講秘密,令我終於明白原來呢段唔見得光嘅不倫關係,就同呢首歌歌詞所描寫一樣,主角無勇氣反悔婚姻承諾,只能將心聲悄悄安葬喺岩洞。

希望聽完呢首歌嘅你,現實有心事唔敢講嗰陣,都可以記返起呢首歌,搵座吳哥窟傾訴心情。

後記:特別嗚謝攝影師 @singwong_02 三十幾度陪我係無冷氣間拍片。

Shan L.

因為住得最遠而被 Yo 姐封為 "搶包珊" 嘅峰弦峰語導師,亦可能係全港首個為咗彈結他而一次都冇打開過新買嘅 PS4 嘅泛音達人。

吳雨霏《吳哥窟》

Guitar
Tunning
Strings
Interface
Mic-pre
Compressor
Mic

Bourgeois Vintage OM
EGDGBE
Pyramid 12
Universal Audio Apollo X16
Neve 1073 EQ
API 2500
Neumann U87

Share

結他教室|如何選購適合嘅弦線

每堂必答|買乜牌子好?

入門班嘅同學好多時都會問結他線買邊一隻最好?記得我都仲係新手都一樣,入到去十多個牌子,唔同嘅物料,然後又有不同嘅號碼,根本花多眼亂,最好唔好煩,你話比我聽邊隻好我就買邊隻,但係其實都要了解下你鍾意嘅音色同你手上枝結他適唔適合嘅,唔係上錯線都可以好大鑊。講點選購前,我地可以講解一下結他線上嘅包裝資訊,包裝上面一般都會顯示:唔同弦線嘅粗幼、包覆物料,以及係唔係 Coated Wire。呢幾個資訊都係選購時需要考慮的,而我都會逐一詳細講解佢地嘅分別。(咪玩啦!最緊要其實係價錢牌! >_<)

Photo from Themusicworks

弦線粗幼|乜會影響音量架?!

市面上大部份嘅弦線粗幼基本分 4 個等級:Extra Light、Custom Light、Light、Medium,一般都以第一線去區分,0.010為 Extra Light、0.011 為 Custom Light、0.012 為 Light、0.013 為 Medium,而相同既第一線,不同嘅品牌會有不同嘅配搭,以 Elixir 同  Martin 嘅 Light 為例,Elixir 嘅組合係 0.012 0.016 0.024 0.032 0.042 0.053,而 Martin 嘅組合係 0.012 0.016 0.025 0.032 0.042 0.054,所以同一個等級不同嘅牌子都有不同嘅音色,不同弦線嘅粗幼到底點影響結他手感和音色?詳細可以睇返《阿峰扎記 #3|同學仔,你買啱結他弦未?》

小編自己一直用開 Light,好似彈《月球上的人》我就會揀 Medium,因為每提升一個級別嘅粗幼,弦線嘅 Tension 會提升大概 10 %,音量自然會提升,從而令低音部份較結實,但考慮到結他嘅壽命,平衝手感及音色,Light 一直係我嘅 1st choice。

Image from martinguitar.com

鋼材物料1|知唔知你用緊嘅係咩線呢?

結他線嘅鋼材物料聽得最多就係 80/20 Bronze 同 Phosphor Bronze,其實仲有其他製造物料,分別係 Silk & Steel 同 Nickel Plated,但因為唔算主流,所以市面上都唔易見。咁到底大家又知唔知所指嘅物料係邊 part? 唔同物料嘅音色又係點? 講之前先解構弦線嘅結構,大家可以望一望你枝結他嘅三四五六線同一二線嘅分別,一二線結構好簡單,只係一條金屬線,然後再望下三四五六線,佢結構複雜少少,好明顯見到一圈一圈嘅金屬線。其實三四五六線係由金屬線包覆住弦芯,而 80/20 Bronze 同 Phosphor Bronze 就係指呢外面包覆住弦芯呢層,而唔係指整條弦線。80/20 Bronze 指物料由 80% 銅同 20 % 鋅嘅合金組成,顏色偏金色; Phosphor Bronze 則由 92% 銅同 8%嘅磷同錫嘅合金,而呢款因為銅比較多,顏色偏向玫瑰金;Nickel Plated 指銅線表面鍍上一層鎳,所以佢係銀色(鎳咪就係平時鍍係耳環上嘅金屬);而 Silk & Steel 指鋼線作包覆物料,但與弦芯中間包多一層絲線,都係銀色嘅。所以快快望下你枝結他用緊咩顏色嘅線,睇埋落去判斷自己到底適唔適合用呢種線(自己當然生哂銹變哂色我就幫你唔到了)。

Image from BCA chemistry

鋼材物料2|今次真係識條鐵

作為主修化學嘅結他手,我可以話你聽,不同金屬嘅硬度及延性都係唔同,所以唔同嘅鋼材物料對音色都會有好大嘅影響。Silk & Steel 因為中間夾左一層絲線,所以係咁多種物料當中,佢嘅張力係最低,上面就提到張力同音量嘅關係係成正比,所以音量相對較低,音色同古典結他相似,音色唔太適合做 Strumming 呢類。Nickel Plated 、Phosphor Bronze 及 80/20 Bronze,呢三種線以 80/20 Bronze 嘅音色最明亮,最適合做 Strumming;Nickel Plated 音色最溫暖,用黎彈”小天使”呢類嘅慢歌一定可以將氣氛帶出,但低音力度輸出較低;Phosphor Bronze 剛好係兩者嘅平衡,有溫暖嘅音色同時又平衡到低音嘅力度。總結以上,必需考慮你嘅演奏風格,再決定邊一款弦線最適合自己。

Image from Stringbymail.com

包覆技術|弦線嘅續命丹

前面提到結他線係由金屬造,細個唔需要讀過 IS (綜合科學)都知道金屬就一定會生銹,結他線都一樣,尤其製造弦線嘅主要金屬-銅。金屬最大嘅敵人係水同氧氣,彈結他一定會出手汗(唔信你望下你掂得最多嘅頭三格),同埋弦線同空氣接觸都會令結他線生銹,所以結他線嘅壽命一般只有兩至三個月(其實最尾兩個星期都係死頂唔換線)。有見及此,好多廠商都會用唔同方法增加壽命,例如鍍其他氧化速度較慢嘅金屬上去、又或者利用一種包覆技術係條線上面做一層薄膜,即係”包膠”。呢個方法係十分聰明,能夠大幅延長結他線嘅壽命,但因為金屬物料改變同薄膜影響弦線振動嘅傳送效率,從而影響音色。雖然會影響音色,絕對係易出手汗用家又或者懶惰用家嘅恩物,所以都深受大眾嘅歡愛,絕大份品牌都都有出呢類 Coated Strings。睇到呢道一定以為換左 Coated Strings 就保用一世唔需要再換?答案當然唔係!因為呢層 Coating 好薄,太厚就會阻到弦線振動嘅傳送效率,大家一路勾線係會造成表面層 Coating 損耗,空氣都依然有機會接觸弦線令佢氧化,都係要換的(T.T)。

Image from Elixirstrings

總結|好弦線=粗幼 X 物料 X 牌子 X 保護

所以,選擇弦線時,記住呢個口訣:”最適合你既弦線=粗幼X物料X牌子X保護” ,決定手感同音色既平衡去考慮就唔會有錯。最最最重要係大家必需要定期為結他換上新嘅弦線(最離譜聽學生分享佢彈左咁耐無換過線),弦線老化會影響音色,音色同手感變差絕對影響練習質素,老土講句:工欲善其事,必先利其器!

photo from madeit.com


學生錄音系列|阿寶, Justin, Jimmy

[True True|by 阿寶]

https://youtu.be/b9PGCfAlC-o
學生阿寶:
係峰弦峰語由零開始學結他,到宜家已經兩年有多,True True 係我其中一首最喜愛既曲目,初時知道有機會用True True 錄音,真係好開心!多謝珊老師同永老師既悉心指導🙌🏻🙌🏻

另外,從來冇諗過自己可以係專業錄音室錄音,呢次有幸體驗到錄音室既專業器材同永老師一絲不苟既製作態度,真係大開眼界。再次感謝峰弦峰語比呢個機會我🙌🏻🙌🏻

導師Shan L.:
True True 呢首歌絕對係我結他涯好重要既一首歌,佢係我第一首識彈既 Fingerstyle,當時既我,可能連呢種演繹方法叫 Fingerstyle 都唔知。好記得第一次見阿峰,佢叫我是但彈 D 野比佢聽,我係彈左 True True 比佢聽,屈指一算咁就跟左佢 N 年了。去到今日,居然已經有自己既學生,仲可以入錄音室錄音,真係 Unbelievable。

—————————————————————————
Guitar: Blue Gc-CM | Cedar & Mahogany
Interface: Universal Audio Apollo X16
Mic-pre: Neve 1073 EQ
Compressor: API 2500
Mic: Neumann U87

[曖昧|by Justin]

https://youtu.be/1TUM2shBdkM
第一次聽呢首《曖昧》嘅 fingerstyle已經好鍾意,無諗過仲可以喺專業錄音室錄埋佢出嚟 😱 。今次我彈嘅呢個版本其實唔算複雜,關鍵係要保持穩定性,同帶出戀愛嘅感覺☺。總括嚟講係一次好寶貴,好好玩嘅體驗。多謝永sir 邀請我參加呢個 project,我真係學到好多嘢 🤓

對我嚟講,學結他係一個探索自己能力嘅旅程。最初由學㩒chord,勾線等基礎,到而家要靈活掌控彈出嚟嘅音色、味道。途中當然會有啲波折,但全靠永sir 嘅悉心教導,睇得出呢一年幾一班同學都成長好多。希望未來會有多啲同學仔一齊上堂啦 😉

—————————–
Guitar: 黑潮 AD-X6 | Sitka & Mahogany
Interface: Universal Audio Apollo X16
Mic-pre: Neve 1073 EQ
Compressor: API 2500
Mic: Neumann U87

[安靜|by Jimmy]

喺朋友眼中,小弟從來唔係一個安靜嘅人,可能係因為我没有這種天份,安靜的沒那麼快啦,所以今次有機會挑戰自己錄呢首”安靜”,都總係覺得爭左啲,有啲美中不足嘅感覺。
今次喺錄音室,聽住自己嘅缺點不斷地放大,令我諗起當年上入門班,老師教我地”左手係技術,右手係藝術,而練琴最緊要自律”。而學左兩年幾後,我覺得學結他黎講,技術、藝術、自律呢三樣野好似健身三寶一樣,精氣神缺一不可。雖然彈結他未必可以健身健心,但自律地練習技術、學習藝術,我覺得對身心,甚至人生都有正面嘅影響。希望黎緊有更多峰弦峰語同學仔,一齊用結他健身、健心啦!😆
多謝師父永!🤟🏼
———————————————————————————
Guitar: Furch Green G-SM | Sitka & Mahogany
Interface: Universal Audio Apollo X16
Mic-pre: Neve 1073 EQ
Compressor: API 2500
Mic: Neumann U87


謝霆鋒 如果只得一星期|結他 Fingerstyle

如果只得一星期|你有珍惜的人或事嗎?

如果只得一星期 寧願哪日放開你 以後會更回味

如果所有既關係都一早劃上一個限期,好似麵包一樣印上此日期前最佳,你買之前一早知道幾時到期,你又會點樣利用餘下既時間?

由朝早七點開始,去冰室食早餐,然後睇場早場,一齊食Lunch,嘆杯咖啡再去海旁睇日落散步,行到攰又再坐下,再直落晚飯⋯⋯如是者維持到最後一秒,可能中途咁岩揀左套你唔岩睇既戲、食左間你唔鍾意既餐廳、又或者咁岩嗰日落雨心情唔好,可能會因為所剩既時間唔多,會選擇原諒同忘記,因為始終唔想浪費時間無謂既爭執上面,要好好珍惜每分每秒。

如果你已經諗到點用呢一星期,何必等到呢一星期既來臨?不如由以家開始珍惜你地既時間。

編曲心得|以Harmonic為結尾的原因

這首歌我最喜歡既部份係嗰段純結他既前奏,喺我仲未識彈結他既時候好想學識佢。我聽既時候係大概中學,我諗當時我都無諗過最後會彈埋 fingerstyle 版。中間間奏部份係我自己加入的,令氣氛推高,最後由 Harmonic 結尾。就好似每個故事既結局前都會係故事既高潮,完結後靜靜地回憶返故事入面每一個細節。

P.S. 係咪覺得最後段 Harmonic 好清呢? 有大半功勞歸功於今次我用既結他,佢就係 FURCH 既 ORANGE SERIE,同佢都相處左一段小日子,之後我都會為大家講一講呢枝結他有咩特別之處,認識下 Black Walnut 係咩木。

Shan L.

因為住得最遠而被 Yo 姐封為 "搶包珊" 嘅峰弦峰語導師,亦可能係全港首個為咗彈結他而一次都冇打開過新買嘅 PS4 嘅泛音達人。

如果只得一星期 謝霆鋒

Guitar
String
Tuning
Mic/PU
Mic-Pre
Interface

Furch Orange Gc-SW
Elixir Light Gauge
EADGBE
WarmAudio WA87
WarmAudio WA273
Focusrite Clarett 8Pre

Share