陶喆 / 愛很簡單 Guitar Fingerstyle [Tab]
愛上很簡單愛下去很難
陶喆 / 愛很簡單Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Furch Guitars Yellow Deluxe Gc-CR
Tab / funguitar.pro
黎緊呢一年,應該會開始重新編返一啲過往嘅作品。《愛很簡單》呢一首歌做個起點都唔錯。
諗起呢一首歌,唔知點解諗返起幾年前,幫一個大同求婚就係用呢首歌。佢喺個沙灘上面拎住支結他自彈自唱(我負責拎相機啫其實),然後單膝跪地,當然係成功啦。好記得當日在場所有人都好感動,而佢地嘅婚禮都好順利完成。好似就係當時,我錄過一首《愛很簡單》俾佢。只係有樣嘢我哋所有人都估唔到:童話式嘅起點,未必會有童話式嘅結局。因為就係我打緊呢篇文嘅時候,佢哋各自都已經有自己嘅家庭(當然我唔會話你知個過程很難看)。
咁到底愛係簡單定係唔簡單?我喺編呢一首歌嘅時候,有少少啓發想同大家分享一下,純粹吹水切勿真。
話說當初有重新編曲嘅時候,都係想編得易啲。咁我諗住編 C Key,Drop D,頭三格,難極有個譜啦?應該好快搞掂啦?結論係我都搞咗成個星期。咁當然我好想賴落去中咗 COVID 未回氣啦,但實情係,其實過程中我都成日 ban 自己,例如唔想重覆以前嘅手法。改下改下又將頭三格,推咗一半上咗中把位。喺你追求完美嘅同時,先會明白,首歌上手仲係容易啲,難咗嘅係自己嘅標準,以致其實就會一路錄一跟出現一個妥協嘅過程。今次妥協度咪錄咗首歌出黎囉,下次呢?或者總有一次唔肯再妥協呢?
呢件小件其實真係冇咩參考價值,只係我諗,其實《愛很簡單》呢首歌會唔會係想表達:愛上很簡單,愛下去很難。
2023 年情人節,祝大家長廂廝守。
I LOVE U 無法不愛你 BABY
說你也愛我 嗚
I LOVE U 永遠不願意 BABY
失去你
林家謙 / 記得 Guitar Fingerstyle [Tab]
如果有一日我黎到彩虹橋接你
你會唔會仲認得我?
林家謙 / 記得Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Dowina Guitars Padauk GAc-ds
Tab / funguitar.pro
呢首歌,我係特登彈黎送俾一位學生,希望佢嘅小狗 Dolly 可以係彩虹橋嘅另一端,從此無痛苦咁樣生活落去。以我所知其實 Dolly 一直都好鐘意聽住佢彈結他。或者結他聲,都可以係令佢喺最後嘅時光得到慰藉。
早幾日都係 ig 問過大家一個問題:如果你可以同已經離開咗嘅小動物講一說話,你會想講啲咩?其中一個朋友嘅回應比較深刻嘅係,咁我就將呢一段 voice message 轉返做文字,希望借住呢首歌可以幫你轉達你嘅說話:
「由你半歲開始黎到我哋身邊,到早一排你離開咗。我哋全家都仲未好適應,每當走近門口,好似仲會聽到你嗚嗚叫我哋;落床嘅時候仲會覺得你會撲上黎;甚至你飲水隻碗我哋都未收走。
初頭以為你只係少少唔舒服,直到後來隨住你出入醫院嘅日子多咗,我先知道原來你就黎唔得了。望住你連最鐘意食嘅零食都提唔起心機。我都好心痛,忍唔住喊咗好多次,唯有喺你最後嘅日子用晒我全部時間黎陪你,用盡力去珍惜同你一齊嘅每個時刻。你仲記唔記得有一日我同你講話,我唔使返工啦,我哋日日去遊車河啦?跟住我哋去均好多你最鐘意嘅公園玩。我淨係想你知道,今生今世,你都係我囝囝。
你畢業生活愉快嗎?嗰邊有冇狗狗蝦你?如果有一日,我黎到彩虹橋接你,你會唔會仲認得我?」
請記得 誰有停留過
請記得 曾有一份愛存在
請記得留住感覺過渡在人海
我記得 熾熱曾盛放
鄭伊健 / 甘心替代你 Guitar Fingerstyle [Tab]
每個男人心入面
都會有一個“細細粒”
鄭伊健 / 甘心替代你Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Furch Guitars Orange OMc-SR
Tab / funguitar.pro
陳浩南同埋細細粒嘅故事,可能就算連冇睇古惑仔嘅人都知道;最經典一幕要數,當陳浩南眼睜睜睇住細細粒中槍,然後就響起嗰一首聽馬上勾起回憶嘅《甘心替代你》。
我哋冇陳浩南嘅經歷。但原來,每個男人心底,都會有一個“細細粒”。喺我哋最幼嫩嘅歲月,記憶中除咗一班豬朋狗友外,身邊一定有一個細細粒,佢見過你對抗呢個世界,亦見過你最幼稚嘅一面,你見過佢笑得最開心嘅樣,同時佢亦俾你整喊過好多次。你嘅人生重大決定,都有佢喺你身邊。
點點滴滴,你以為無關痛癢,卻早已圍繞四周,陪你笑,陪你哭,陪你走,陪你飛。佢塑造你嘅價值觀,由你傻乎乎到擁有全世界,成為你最大嘅動力。只係當時對於人生,我哋冇認真嘅概念;對於承諾,我哋冇負責嘅概念;對於緣份,我哋冇珍惜嘅概念。
“細細粒”相信,會等到我哋長大嘅一日。但最後,往往都等不到。因為佢估唔到,就喺佢悄然離開嘅嗰一日,先係我哋真正長大嘅一日。忽然醒悟先知道,佢已經因為我哋嘅幼稚受過很多苦;我哋先明白,冇咗佢,會係連喊都釋放唔到嘅痛。
太遲了,呢份心意,早早化成灰燼。唯一可以做嘅,就係淌淚,心痛,告別你。
好鐘意一句說話:可能每個男孩子,命中注定會遇到一個無法挽回的女孩,痛苦地失去過,才會成為真正嘅男子漢。她將會為你受傷,但佢嘅傷痕,會係你明天茁壯成長嘅養份。今日,如果你咁啱諗起佢,請喺心入面好好感謝佢;而如果有幸你嘅細細粒仲喺你身邊,記得好好珍惜佢。
仿佛天和地在挑選我跟你
如像我亦重遇了生死
難道只好淌淚心痛告別你
無法讓我此際替代你
陳卓賢 / 留一天與你喘息 Guitar Fingerstyle [Tab]
試下用呢首歌練右手嘅層次感
陳卓賢 / 留一天與你喘息Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Bourgeois Guitars Soloist (Long Fung Tam Sig.)
Tab / funguitar.pro
今年情人節好多人都約咗人,個個都約咗 Ian 。所以我都約埋一份,送俾大家,可能係今年二月廣東歌最浪漫嘅作品。
今次左手方面編得再簡單啲,大家專心啲練下個 touch 啦。另外大家如果有機會去彈下份譜,就會發現其他都好多 Detail 位置可以試下控制下右手嘅 Dynamic,例如勤力少少做多啲啲 Thumb Rest Stroke,咁樣又可以突出到低音嘅同事,亦都唔遮咗個旋律。當然再用多啲 Quick Arpeggio 就更理想。
咁當然,練到咁上下你都會發現,一切都係 Bourgeois 嘅魔力……
其實我只想 棲身一抹暖光
沒說出口 心聲可以釋放
曾是獨個苦惱徬徨
卻是你 留住得一天也耐看
許美靜 / 傾城 Guitar Fingerstyle [Tab]
和你有關的遺憾是我這輩子無法再整理的行李
許美靜 / 傾城Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Bourgeois Guitars DB Sig. OMSC 9224 (Customized for Riley C.)
Tab / funguitar.pro
呢首歌我彈黎,送俾一位我嘅好徒弟。祝你過到英國生活愉快,早日識到鬼妹,唔好太掛住我哋。呢支你走之前訂嘅 Bourgeois Guitars,係我搵咗好耐先搵到,真係有錢都未必買到嘅 Brazilian Kingwood(本身已經係罕有過 Brazilian Rosewood,呢一套紋仲帶一點波浪紋 ),為師已經幫你盡量開光,用黎彈呢首歌送俾你。
走之前我有問過你,點啊執好行李未?所指行李,大家心照啦。「有得未執好㗎咩?」又係嘅,人生在世,唔係每一件事都可以俾你好好準備,好好執捨,都可以俾你慢慢劃一個句號。
或者留低嘅遺憾,會成為另一種緣份?或者就係整定你要學識放低,一個無論如何都放唔低嘅一個人。
唔緊要嘅,只係需要記住,你遺下嘅行李,就如同你自己一樣,早晚都會俾另一個人認領,或者咁講,好嘅句號,其實唔使太大費周章,有時只需要幾句歌詞。
傳說中 癡心的眼淚會傾城
霓虹熄了 世界漸冷清
煙花會謝 笙歌會停
顯得這故事尾聲 更動聽
何韻詩 / 勞斯萊斯 Guitar Fingerstyle [Tab]
從《勞斯萊斯》走到《大叔的愛》
何韻詩 / 勞斯萊斯Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Bourgeois Guitars OMSC Double X
Tab / funguitar.pro
隔了許久,又決定重新再編過呢首歌。諗起八九年前,第一次編曲用咗 Standard Tuning + C Key 硬爆一段高把位彈咗半首,而家用特殊調弦,終於做咗一個豐富嘅完全版。見證住自己開始步入大叔嘅年紀。
然後大家又有冇諗過,勞斯萊斯其實就係大叔的愛嘅前傳?
或者好多小朋友未聽過呢首歌,但如果你細心睇下歌詞,不難發現當日前人們為咗一份信念,每一步都係血淋淋,有血有淚,經歷咗好多痛苦同埋掙扎,受到好多嘅狠毒難聽嘅說話,先換到大家嘅接受,先會有今日嘅輕鬆搞笑嘅大叔的愛。
再彈一次呢首歌,除咗係完成咗自己八九年前未完成嘅一份心血之外,都係想再提醒自己,永遠唔好忘記前人嘅努力。或者有一日,當勇氣都會變成禁忌,總要記得自己曾經真摯地活過。
PS. 預計過支琴嘅性格真係好似佢主人,但我冇諗過會似成咁,Sinker 嘅溫,Double X 嘅厚,Ebony 嘅忠實,好似照住佢個性格砌出黎咁。
為何還害怕
若覺得這樣愛
尚在計算他又是誰 可否愛
旁人那個 接受這種愛
張敬軒 / 百年樹木 Guitar Fingerstyle [Tab]
極罕配極罕
發生在結他身上的《百年樹木》
張敬軒 / 百年樹木Guitar Fingerstyle [Tab]
Fingerstyle Arrangement / Long Fung Tam
Text / Long Fung Tam
Guitar / Bourgeois Guitars DB Sig. OMSC
Tab / funguitar.pro
再沒有一支結他更適合彈這首歌了,或許這麼說,我編的這首張敬軒的歌,等到了最適合的演奏者。這裡指的,不單單指是音色,還有這支結他的故事。這支結他的面板和底側板,各自經歷了百餘年的奇遇。
百餘年前,這支琴的底側板在世界聞名的夏威夷 Moanalua Garden 出世不久,面板已經在美國的一條古老隧道工作。貴為花園其中一大樹,園內有更有名氣的 The Hitachi Tree,她再美也只是陪襯品;作為其中一條支撐隧道,不起眼的紅木,火車來來往往,他再累也沒人過問。就這樣過了這百餘年。
按照劇本,生命的軌跡應從不交錯,各不留痕於這世上。但生命的價值從不僅在於生存的片刻,有如那個無人不識,割去耳朵的畫家。
百餘年後,她在花園染上怪病死去,斬下來留才發現是世間少有的 Cuban Mahogany Tree,其基因難得一遇的程度,竟吸引科學團隊為她進行基因移植,複制出種遍大地的新生命,而被斬下來的 Mother Tree 的其中一塊,就是這支結他的底側,擁有結構最罕見 Fiddleback Figure 的 Cuban Mahogany;百餘年後,隧道被燒了,拯救隊在灰燼中救出這塊紅木,發現其硬度超群,木頭自作隧道起經歷的風乾及震盪,早已刻進木紋裡,音色透出古老樂器的深度,他就是這一塊世上僅存不多的 Tunnel 13 Redwood 面板。
人生有限,短促得有很多時根本沒法辨認出事物的價值。同樣地,世間最盪氣迴腸的愛情故事,往往都是由最平凡的交織開始。你再幸福,你再傷心,你再妒忌,你再不捨,一百年,通通化為污有。
最後送俾大家,百年樹木 Fingerstyle。
在最燦爛時光
交織美麗的錯愛
若有無奈
只有用新的愛情來做替代
測評 / Bourgeois Guitars x Tunnel 13 Redwood
歷火重生香港難得一見傳奇結他面板
測評Bourgeois Guitars x Tunnel 13 Redwood
香港罕見傳奇面板Tunnel 13 Redwood x Bourgeois 家族誕生
Tunnel 13 Redwood 毒性持續曼延,到今日我支 Tunnel 13 Redwood DS12 已經多咗兩個細佬妹啦。連第四支都準備出世,短短一年內四支傳說級面板嘅結他抵港,速度之快,連 Bourgeois 果邊都嚇一跳。我諗起一年前去 Bourgeois 廠,我同自己講,我要將最好嘅嘢帶返黎香港,係因為,香港真係仲有好多好有心嘅結他手。佢哋擁有最好。
講返 Tunnel 13,到底我點樣同呢一套傳奇之木結緣呢?
歷火重生
百年隧道紅木華麗蛻變
自 1880 年起,Tunnel 13 已為美國加洲其中一條常用的隧道,全美國最後 一宗黃金火車械劫案就是在這裡發生。於 2004 年,Tunnel 13 因火災而清拆,竟發現在灰燼裡剩下用作支撐隧道的木材,是約有 2000 年歷史,擁有絕頂音色的紅木!那就是稀有木材 Tunnel 13 Redwood 的由來。
長達一世紀(120年)的自然風乾,加上長年受火車路經時的震動,這些經歷讓這些本已珍貴的木材,變得更適合作結他製作。不要忘記,作為可以承受火車重量的木頭, Tunnel 13 Redwood 是擁有不尋常,甚至超越雲衫的剛性。不單傳震度大大提高,聲音亦更為通透,比起一般紅木有更好的高頻和力度,同時不失溫暖感。
說話啱啱從 Bourgeois Factory 返到香港之後,某一個星期我俾一個 YouTube Notification 叫醒咗。見到我嘅美國嘅朋友 Matt Chulka 出緊一個評測,當時嘅我之係用手機嘅 Speaker 彈,但一聽成個人醒了。
那時,我第一次感受到 Tunnel 13 Redwood 嘅魔力。
由於呢種咁傳奇嘅面板係坊間可能少於 100 套,所以我都用咗少少時間先搵到得四套(筆按:現在都不太可能找到原料了),佢哋都係火災後重生嘅隧道木,長時間自然風乾嘅威力不是說笑的。Bourgeois Factory 收到這幾套原料是,甚至說過可能係佢哋近年收到最好聽嘅紅木之一。跟一般 Cedar 不同,這套木的剛性十足,音量飽滿,高頻帶有很濃厚的 Woodiness,顆心感幾乎可以與 Spruce 媲美。
限量四支Tunnel 13 Redwood 結他陸續抵港
Bourgeois Factory 的四支 Tunnel 13 Redwood 分別為以下配置。
- DS-12 / Tunnel 13 Redwood x Cocobolo
- Slope Dreadnought / Tunnel 13 Redwood x Cocobolo
- OMSC / Tunnel 13 Redwood x Cocobolo
- OMSC / Tunnel 13 Redwood x Cuban Mahogany
當中另一支較深刻的就是第四支,因為用上 Cuban Mahogany,音色實在很驚人,非常溫暖。我用了來彈張敬軒的《百年樹木》,大家聽聽就知道了。
每一枝手工結他都有他的故事, Bourgeois 是我們在香港獨家代理的品牌,如果大家有興趣,可以再深入了解一下 Bourgeois 的品牌故事,或者預約時間到我們門店親身體驗一下。