January 26, 2023

其中一個原因竟然令50%女仔放棄?!


學結他關注組 /盤點女仔學結他嘅五大難處!

Twiggy Lau

FUNGUITAR specialist
喜歡自彈自唱
人氣駐唱歌手 / 唱歌老師

前言


好多人都覺得識彈結他嘅女生好有才華~Busking 嘅時候,我都好鐘意自彈自唱。但其實結他手,尤其是女結他手學結他時遇上嘅挑戰,未必係大家估到嘅~今日就同大家講下5個女仔學結他時會遇到的問題喇!

1. 手指頭痛


每個人初學結他時都要經歷痛的試煉,但正正因為經歷過呢個階段,進步嘅時候真係會特別滿足!宜家諗番起,我一開始學結他嘅時候,成功彈到第一首歌真係好有成功感。當時我嘅結他老師超級嚴格!要求我一個月内表演自彈自唱 Norah jones 版本的Love me Tender。為了達成呢個目標,我真係日練夜練,每天練5個鐘。手指頭痛已經係一早預咗,但因為初學唔識發力,嗰時我啲手指係痛到要每日塗3次止痛膏。宜家諗番轉頭,都唔明自己係點做到。

雖然好痛,但唔努力過點會有成果喎~

2. 不能Gel甲、要剪手甲


對我或者好多女仔黎講,Gel甲絕對係一個減壓活動!無論番工有幾攰,只要睇到精緻嘅指甲,心情就會不自覺變好~所以開始 Gel 甲後,大部份女生都番唔到轉頭!但學結他就必須放棄打理指甲,而且仲要剪埋左手嘅指甲,男仔可能唔明,但我地真係好心痛㗎。雖然有啲荒謬,但我相信有一半女生都係因為忍唔住要 Gel 甲而放棄學結他嘅!

啲指甲禁靚,點捨得拆喎~

3. 結他很重


對比起琴,結他真係好方便攜帶嘅樂器,所以我平時出show都係一支結他伴奏。即使係禁,對於女仔黎講,揹住結他一整日,其實都幾重~因為出去表演通常除咗樂器同音響,其實仲有好多野帶更要帶,例如替換衣物同埋化妝品等等。貪靚啲嘅女仔仲會帶埋高跟鞋(我XD)日常用品加埋結他,如果要揹全日,對於我呢種比較大份嘅女仔黎講都會吃力,何況係體型較小嘅女仔呢。

我好愛你呀結他,但你真係好重XD

4. 女生的手較細


天生硬件上,男仔彈結他其實係比女仔有少少優勢嘅~女仔除咗隻手比較細,手指亦比較纖幼,所以一般女仔禁 chord 會比較吃力~不過禁樣嘅問題其實都可以透過結他 set up 解決!通過微調結他弦距可以令Guitar更適合女仔嘅手型,手比較細嘅女仔都可以選擇較窄嘅琴頸。試咗 set up 過嘅結他之後真係會番唔到轉頭㗎!

Set up 完真係易禁啲,可以彈耐好多~

5. 因為比較中意唱歌忽略咗結他


而家越來越多女仔學結他,但我留意到,身邊嘅女仔 friend 大部分都係因為想自彈自唱而去學結他嘅(我自己當初都係XD),所以比較少深入研究點樣可以彈得好聽,又或者學習 fingerstyle 。因為禁,學咗一段時間之後,有可能就會轉為自學,又或者將精神放返喺唱歌,忽略咗練習結他,最後無疾而終。

雖然女仔係彈結他嘅路上遇到嘅困難比較多,天生嘅條件亦會比較輸蝕,但係如果女仔彈得好真係好型的!而且可以證明到比其他人睇,只要我地努力,做咩都唔會比男仔差嘅~所以練習好痛苦嘅時候!Girls,記住!只要有足夠嘅熱情,記得當初排除萬難都要堅持嘅原因,一定可以撐落嘅!

Twiggy Lau

FUNGUITAR specialist
喜歡自彈自唱
人氣駐唱歌手 / 唱歌老師