每堂必答|買乜牌子好?

入門班嘅同學好多時都會問結他線買邊一隻最好?記得我都仲係新手都一樣,入到去十多個牌子,唔同嘅物料,然後又有不同嘅號碼,根本花多眼亂,最好唔好煩,你話比我聽邊隻好我就買邊隻,但係其實都要了解下你鍾意嘅音色同你手上枝結他適唔適合嘅,唔係上錯線都可以好大鑊。講點選購前,我地可以講解一下結他線上嘅包裝資訊,包裝上面一般都會顯示:唔同弦線嘅粗幼、包覆物料,以及係唔係 Coated Wire。呢幾個資訊都係選購時需要考慮的,而我都會逐一詳細講解佢地嘅分別。(咪玩啦!最緊要其實係價錢牌! >_<)

Photo from Themusicworks

弦線粗幼|乜會影響音量架?!

市面上大部份嘅弦線粗幼基本分 4 個等級:Extra Light、Custom Light、Light、Medium,一般都以第一線去區分,0.010為 Extra Light、0.011 為 Custom Light、0.012 為 Light、0.013 為 Medium,而相同既第一線,不同嘅品牌會有不同嘅配搭,以 Elixir 同  Martin 嘅 Light 為例,Elixir 嘅組合係 0.012 0.016 0.024 0.032 0.042 0.053,而 Martin 嘅組合係 0.012 0.016 0.025 0.032 0.042 0.054,所以同一個等級不同嘅牌子都有不同嘅音色,不同弦線嘅粗幼到底點影響結他手感和音色?詳細可以睇返《阿峰扎記 #3|同學仔,你買啱結他弦未?》

小編自己一直用開 Light,好似彈《月球上的人》我就會揀 Medium,因為每提升一個級別嘅粗幼,弦線嘅 Tension 會提升大概 10 %,音量自然會提升,從而令低音部份較結實,但考慮到結他嘅壽命,平衝手感及音色,Light 一直係我嘅 1st choice。

Image from martinguitar.com

鋼材物料1|知唔知你用緊嘅係咩線呢?

結他線嘅鋼材物料聽得最多就係 80/20 Bronze 同 Phosphor Bronze,其實仲有其他製造物料,分別係 Silk & Steel 同 Nickel Plated,但因為唔算主流,所以市面上都唔易見。咁到底大家又知唔知所指嘅物料係邊 part? 唔同物料嘅音色又係點? 講之前先解構弦線嘅結構,大家可以望一望你枝結他嘅三四五六線同一二線嘅分別,一二線結構好簡單,只係一條金屬線,然後再望下三四五六線,佢結構複雜少少,好明顯見到一圈一圈嘅金屬線。其實三四五六線係由金屬線包覆住弦芯,而 80/20 Bronze 同 Phosphor Bronze 就係指呢外面包覆住弦芯呢層,而唔係指整條弦線。80/20 Bronze 指物料由 80% 銅同 20 % 鋅嘅合金組成,顏色偏金色; Phosphor Bronze 則由 92% 銅同 8%嘅磷同錫嘅合金,而呢款因為銅比較多,顏色偏向玫瑰金;Nickel Plated 指銅線表面鍍上一層鎳,所以佢係銀色(鎳咪就係平時鍍係耳環上嘅金屬);而 Silk & Steel 指鋼線作包覆物料,但與弦芯中間包多一層絲線,都係銀色嘅。所以快快望下你枝結他用緊咩顏色嘅線,睇埋落去判斷自己到底適唔適合用呢種線(自己當然生哂銹變哂色我就幫你唔到了)。

Image from BCA chemistry

鋼材物料2|今次真係識條鐵

作為主修化學嘅結他手,我可以話你聽,不同金屬嘅硬度及延性都係唔同,所以唔同嘅鋼材物料對音色都會有好大嘅影響。Silk & Steel 因為中間夾左一層絲線,所以係咁多種物料當中,佢嘅張力係最低,上面就提到張力同音量嘅關係係成正比,所以音量相對較低,音色同古典結他相似,音色唔太適合做 Strumming 呢類。Nickel Plated 、Phosphor Bronze 及 80/20 Bronze,呢三種線以 80/20 Bronze 嘅音色最明亮,最適合做 Strumming;Nickel Plated 音色最溫暖,用黎彈”小天使”呢類嘅慢歌一定可以將氣氛帶出,但低音力度輸出較低;Phosphor Bronze 剛好係兩者嘅平衡,有溫暖嘅音色同時又平衡到低音嘅力度。總結以上,必需考慮你嘅演奏風格,再決定邊一款弦線最適合自己。

Image from Stringbymail.com

包覆技術|弦線嘅續命丹

前面提到結他線係由金屬造,細個唔需要讀過 IS (綜合科學)都知道金屬就一定會生銹,結他線都一樣,尤其製造弦線嘅主要金屬-銅。金屬最大嘅敵人係水同氧氣,彈結他一定會出手汗(唔信你望下你掂得最多嘅頭三格),同埋弦線同空氣接觸都會令結他線生銹,所以結他線嘅壽命一般只有兩至三個月(其實最尾兩個星期都係死頂唔換線)。有見及此,好多廠商都會用唔同方法增加壽命,例如鍍其他氧化速度較慢嘅金屬上去、又或者利用一種包覆技術係條線上面做一層薄膜,即係”包膠”。呢個方法係十分聰明,能夠大幅延長結他線嘅壽命,但因為金屬物料改變同薄膜影響弦線振動嘅傳送效率,從而影響音色。雖然會影響音色,絕對係易出手汗用家又或者懶惰用家嘅恩物,所以都深受大眾嘅歡愛,絕大份品牌都都有出呢類 Coated Strings。睇到呢道一定以為換左 Coated Strings 就保用一世唔需要再換?答案當然唔係!因為呢層 Coating 好薄,太厚就會阻到弦線振動嘅傳送效率,大家一路勾線係會造成表面層 Coating 損耗,空氣都依然有機會接觸弦線令佢氧化,都係要換的(T.T)。

Image from Elixirstrings

總結|好弦線=粗幼 X 物料 X 牌子 X 保護

所以,選擇弦線時,記住呢個口訣:”最適合你既弦線=粗幼X物料X牌子X保護” ,決定手感同音色既平衡去考慮就唔會有錯。最最最重要係大家必需要定期為結他換上新嘅弦線(最離譜聽學生分享佢彈左咁耐無換過線),弦線老化會影響音色,音色同手感變差絕對影響練習質素,老土講句:工欲善其事,必先利其器!

photo from madeit.com