她,介定我心目中柔的境界|論十里桃花與 Italian Spruce

創造呢支琴,係我十年後帶俾學生們嘅禮物,亦係送俾自己嘅禮物。原因係呢支琴係限量出品(初步預計只有六支),而且只限峰弦峰語學滿一年以上嘅學生可以認購,Sorry,但我有得解釋嘅。

唔係特登想玩飢餓銷售,只係第一:靚木難求,對於紀念版,我冇興趣做海量,只係想做到支支精品。第二:每一把由揀木到 setup,每一個 step,都要親自經我手,確保每一支都達到最佳手感(每支平均 setup 要三個鐘)。老實說,造太多支嘅話,我真係忙到唔識彈結他㗎啦。

自呢個星期錄完音帶咗返 Studio,很多同學仔都偷偷哋試過一下,以至呢支琴雖未正式公開認購,但竟然出現咗一條小小嘅人龍。不過雖然如此,我覺得我都係要正正式式介紹一下佢。

熊爪紋 Italian Spruce|香港名電影書法家華戈親筆題字

《十里桃花》為 OM 設計,正面用嘅,係香港比較少見嘅全實木 Italian Spruce,而且係非常難買,最頂級嘅熊爪紋級別 Bearclaw,背面是縱橫交錯的全實木虎紋桃花芯木 Figured Mahongany。而為左令熊爪紋更突出同埋有一體化嘅效果,面板亦都染咗色。其他設計如 Slotted Head,黑背,香港名電影書法家華戈親筆題字,手枕,雙頭片等等,下次先再講。

如果大家熟行情嘅話,搵一間美國或歐洲嘅大廠造呢支琴,未計支結他,淨係由普通 Italian + Mahogany upgrade 去 Bearclaw + Figured 嘅 option 嘅費用,已經差唔多成萬幾蚊,埋單計講緊係四五萬港幣左右。

之所以我一再強調《攻頂配置入門價錢》,係因為萬幾蚊,正正就係《十里桃花》嘅訂價。實不相瞞,Bourgeois 幫我度身訂做嘅 Soloist,正正就係 Bearclaw Italian OM,不過呢一把 Bourgeois 為我親自打造嘅名琴,價錢差唔多可以買到六把《十里桃花》了(八月有得聽,好似)!

你確定你的學生,都有發揮 Italian Spruce 的修為嗎?|制琴師說

半年前第一次同合作嘅制琴師討論《十里桃花》,提出用 Italian 嘅想法,佢嘅眼神帶啲肯定,又同時似講緊: “傻的嗎”?因為對好多人黎講,Italian Spruce 貴而且少眾;增加制作成本的同時,知音又唔多,即係一句講晒,冇錢賺。

“而且能夠發揮 Italian Spruce,都是右手功夫到家的高手。你確定你大部份學生,都有呢個修為嗎?” 制琴師如是說,有很多人,包括我去美國問過嘅高手,都係咁講。學生,甚至我自己係唔係高手,我唔敢下呢個定論,同時亦唔係話唔喜歡 Italian 就唔係高手(聲音喜好很個人的)。

但至少,就算好多人勸過我,我都冇動搖過用 Italian Spruce 嘅想法;或者咁講,至少我相信,Time will tell。

由七年前我彈 AC3 開始,我已經彈過好多 Sitka Spruce,老實講,本來香港結他種類就唔多,而超過九成結他都係 Sitka Spruce,算係最普遍的面板材料。原料易找,價錢便宜,音量頗大,綫條帶粗,顆粒感大,可收可放…… 都係 Sika 嘅優點。Sitka 結他彈 Fingerstyle 時,因為高頻嘅輪廓很明顯,右手幾乎唔使花太多心思,很容易就可以將旋律彈出黎,所以早六七年,Sitka 可以話係我嘅最愛。

呢幾年隨住我教務繁忙,錄歌嘅作品開始講究,只係有精力彈自己鐘意嘅歌,數量變得好少,但同時每一首我都會度得好仔細,磨好耐好耐。好似早一年彈嘅《月球下的人》,呢個 take 係我差唔多七八個 take 揀出黎。一開始係一個折磨,因為有時追個右手嘅 feel ,真係追唔到個盡頭。但亦因為錄完又 del,del 完又錄嘅關係,我開始鐘意咗 Italian Spruce 呢一種面板。

由唔識欣賞,直到迷戀上|十里桃花紀錄我呢十年嘅成長

Italian Spruce,音量唔猛,顆粒感亦唔及 Sitka,低頻只有恰到好處的份量。但綫條幼細嘅高頻,帶黎嘅係一種從未出現在 Sitka 出現嘅清澈感,會令到分佈喺第一二弦嘅高頻,帶有一點空靈嘅效果。配合埋 Mahongany 嘅飽滿中頻,將成個音色取向進一步推暖。

由始至終,”面面俱圓”從來都唔係我造呢一把琴嘅宗旨,由木材配搭開始,佢已經注定係一把有性格嘅結他,即係好似有性格嘅人一樣:you’re gonna love it or hate it, its your personal taste.

呢一份天生嘅柔,介定我心目中柔嘅境界,就係一份帶暖嘅優雅,同時清澈嘅親切感;而由我唔識欣賞,去到迷戀上 Italian ,《十里桃花》都係紀錄住我呢十年成長嘅一部份。

為大家重新再編一次周杰倫嘅《蒲公英的約定》,用左 Alt. Tuning 嘅新版本 (EAEGBD),唔知大家隔住個芒又感唔感受到果份柔呢?

蒲公英們,願你哋都明白我嘅心意,盡情飛啦。下一節,我哋講下咩叫”沉水紅木” (Sinker Redwood)。

LONG FUNG T.

FOUNDER & DIRECTOR-GENERAL

峰弦峰語創辦人,Bourgeois Guitars 官方指定 Artsits。成日以為可以好得閒一日到黑彈結他然後結果做足廿四小時 Admin 嘅行政總監。

周杰倫 蒲公英的約定

Guitar
Strings
Tuning
Mic/PU
Mic-Pre
Interface

十周年限量版十里桃花
Pyramid Light Gauge
EAEGBD
Neumann KM184 Stereo
Internal
Tascam UH-7000

Share