超高效練結他大法（1）裝咗車道偏離警示未？
彈咗好耐都冇咩進步？原來你做漏咗呢一樣野
前言
上次講完咩係 Guitar Fingerstyle 之後，發覺原來大家對高效練習法都好有興趣，所以決定嚟緊不定期寫下呢個主題，希望我十幾年嘅教學心得幫到大家。今次我哋探一個好困擾結他新手嘅問題：明明我每日都有練譜，點解仲好似彈來彈去都冇咩進步？
首先要搞清楚，練譜其實係咩一回事。好多同學仔以為練琴，就係將一份啱啱拎到嘅譜由頭彈到尾，重覆又重覆，直到彈得出個大概。覺得自己練咗好耐嘅同時，個進度又好似唔多，彈到前面又彈唔到後面咁。
慣性動作：越快習慣越危險
人其實係一種依賴慣性嘅動物，一旦你開始熟悉某一個動作，到你第二第三次做就會開始搵到捷徑，令你更快適應到新技能。不過喺呢個時侯，操作就會憑直覺，變得無咩意識，簡單黎講：你只係重覆緊一個動作，當學習建基於呢個基礎，就會好脆弱，大家睇過 《誰搬走了我的乳酪》，就會明白盲目嘅安逸感，往往都係最危險。
Funguitar創立咗十幾年，教過嘅學生好多，無論係極新手，定係有自學底子嘅都見唔少，有一種學生往往喺上堂嘅初期表達出一種特質，令我好快知道佢一定比起一般人更快學識。例如叫大家示範彈下Pattern，當其他人彈一次就望住我等comment嗰陣，呢種學生會彈完一次之後，自己嗌聲「哎呀」，唔係三心兩意，唔係自我懷疑，而係察覺到自己彈得唔好嘅地方，然後又彈多一次修正。
呢一種性格特質，就係特強嘅自我意識 (self-awareness)。
車道偏離警示：你有留意自己的練習軌跡嗎？
唔知大家知唔知，而家好多注重安全嘅新車，都有一個新功能，叫車道偏離警示，或者車道維持 (Lane Assist），即係話當你行車時，車頭有個鏡頭會識別你馬路嘅線，每當感覺到你越行越偏而又唔係過線，就會電腦介入，拉你返黎中間，確保你唔會出意外。之所以講 self-awareness 尤其重要，係因為呢個感覺就好似你腦人面嘅 lane assist 一樣，練習時無時無刻都要留意住自己嘅練習軌跡。
練結他係一件好易令人分心嘅事，點解咁講呢？你試諗下，一份譜你彈十幾次，首歌大約成型了，你會有成功感啦（阿媽都認得你彈緊咩喇 yeah），會有舒壓感啦（夜媽媽，木結他，又係一個好減壓嘅 Combo 黎嘅），簡單黎講，你好快會進入咗一個享受音樂嘅狀態，獎勵 (Rewarding）嘅情緒會帶住你飄咗去第二度。
快啲整番個車道偏離警示先喇！
但大家諗深一層就會發現，其實挫折同迷失，係任何學習過程嘅必經階段，因為初期熟悉感未出現，摸索期嘅心態必然係戰戰競競，非常累人；而人類生存嘅法則之一，就係趨吉避凶，於是乎為咗盡快達到 Rewarding 呢個目的，我哋一係就會過濾咗一啲不適嘅學習障礙，一係就會用另一個差唔多，但係錯嘅方案去取代佢，試圖等自己盡快過關。
千祈唔好為咗達到 Rewarding，就用另一個差唔多但係錯嘅方案去練習呀！
就以一個例子嚟答大家，可能你啱啱接觸三連音，唔小心將佢混淆咗其他拍子嘅讀法，當你唔察覺自己彈錯，幾次後你就會誤判嗰個係三連音。彈錯幾十次後，基本上你已經冇咗對三連音嘅觸覺。然後你仲會覺得，我明明就練咗三四十次啦！點解仲未學識嘅？錯過咗自己最佳嘅黃金學習時機，反而越來越有樽頸嘅感覺。
練習千祈唔好急，最緊要快！
講咗咁耐，到底我吔要點培養 self-awareness 呢？以下我分享兩個我上堂成日教學生嘅方案或例子。
習慣一：搵出當前大任務
開始之前搵一啲暗示，令自己每練一陣就要記得，自己當前嘅大任務，係建立正確嘅習慣，而唔係急於重覆某個習慣。例如你拍子跟唔上，如果為咗盡快彈得似樣然後上 YouTube 聽下原曲模仿先，而冇消化一下慢慢數一次，到頭來你首歌會彈得似，但對拍子嘅感釁就從來唔會係你身上原生出現。
你可以用螢光筆劃低個重拍，提自己按時踏腳，從而穩定對 BPM (Beat Per Minute)嘅控制，再慢慢拎起支結他都未遲。練琴期間，你甚至可以忽略自己其他不足，例如有少少按得唔好等等，唔好心急，一切以大任務為首選。其實每次可以好有效咁處理好一個小問題，就已經好叻㗎喇！
就用我以下編曲嘅《壞與更壞》為例，最後嗰幾個小節我會建議同學仔咁寫：
習慣二：延遲你自滿嘅情緒
你係為咗咩練結他嘅？想自娛？想放輕鬆？無論係咩都好，延遲一下太早出現嘅正面情緒，因為只有咁樣，你先會繼續反覆研究當中嘅不足之處，從而建立自我修復嘅能力。例如第一次啱啱彈到份譜，唔好急於太快收貨，然後想再彈下一首，可以俾自己一啲難度或者關卡，例如係錄住音仲可唔可以一 take 過呢？力度嘅控制仲可唔可以好啲呢？問下你嘅結他老師，睇下自己仲有咩可以再突破。
總結
大概如果要搵一句金句記低，我會話：
有好多隱藏技術嘅正確學習時機，係必須等份譜熟透，自我發掘好幾次先會觸發到。佢絕對唔會喺初期出現，更加唔會喺習慣未成形嘅時候出現。
最怕當你日復日，以為自己好俾心機練琴，原來只係喺度速食份譜原地踏步，而冇好認認真真咁練過結他。延遲你享樂嘅情緒，集中資源自我修正，先可以搵出啱自己嘅練習軌跡。
如果大家有啲咩唔明白，或者想有人督促你，心動不如行動，即刻報名學結他了解更多啦～除此之外，我哋網站上面都有大量樂譜免費收睇，希望大家可以有多啲資源練習～
自我發掘、精益求精先係學習結他最好嘅態度！
同步刊登於 Re:spect Magazine 272 期
