陳展鵬 & 胡定欣 – 從未知道你最好 結他 Fingerstyle 城寨英雄 片尾曲

 

陳展鵬 & 胡定欣 – 從未知道你最好 結他 Fingerstyle 城寨英雄 片尾曲

《今日,你扔左對繡花鞋未?》
Words & Music by Long Fung Tam呢套劇,越睇越肉緊。本身諗住睇完《一屋老友記》就修心養性去捉 Pokemon,點知睇睇下中埋毒一份,冥冥中似乎我啟暴龍只能停留係 CP637,睇黎都係天意。點解好睇?功夫劇拍得咁認真,一定要睇啦;袁偉豪爆晒肌陳展鵬成身油咁,一定要睇啦;花曼咁妝成個春麗 cosplay 咁,一定要睇啦;仲有,拳佬扔左對繡花鞋果幕,識睇嘅你都一定要睇。果晚講到拳佬知道佢女神刁蘭好迷對繡花鞋,於是不惜上山下海傾家蕩產,去到最貴果間舖買,最後仲要俾人湯到一頸血,連搭船返城寨嘅錢都冇。諗住用左咁多心機,科左咁多水,唔理女神鐘唔鐘意都表左白送左先講啦?點知當拳佬送果陣佢先知道,原來刁蘭要果對要另一個男人送先得嘅,佢果下即刻收埋扮冇事,轉頭就將對對貴價縷花鞋,就咁扔上棵樹(你冇睇錯,繡花鞋黎啫,小朋友買完對 Redwing 唔鐘意千祈唔好學)。嗱我知你地點諗架,你地梗笑佢廢青宅男懦弱冇Guts 啦。嗱,其實拳佬果一下係想話俾你聽一個好重要嘅道理:做人嘅野,呢一刻唔係屬於你嘅野,就要係最適合嘅時間放手。

放手係一門學問,決定好重要,但 Timing 都好重要。放早左,就算人地唔笑你三分鐘熱度,你連自己都交代唔到;放遲左,死纏爛打神憎鬼厭,連朋友都做唔成。放得及時,係最冇傷害性嘅情況下走人,華麗轉身,摶唔到兩滴眼淚,都會摶到兩下掌聲,起碼人地冇揀到你都唔會覺得你樣衰,只會覺得你型。

做咩都好,付出左幾多自己知就算啦,如果下下都用黎計返有幾多收穫,你會好痛苦的話。忍痛扔左佢,話唔埋你可以好似拳佬,最後摶到埋運氣,呢一刻錯過嘅野將來先至有機會再屬於你。

講到呢度我自己都好似明明地,再見了啟暴龍,我都係將你還返俾博士啦。

後記:錄音果陣揀左魚絲,本來係想感覺靜靜地的,但凌晨兩點嘅星期六晚實在太太太大雨啦,既然避唔到雜音,咁我惟有錄埋佢入去啦,忠實還原返實景俾你地。

=-=-=-=-=-=--=-=-=-=-=
喜歡的朋友,記得訂閱我的頻道啊!
Subscribe my YouTube if you Like it!

Instagram: tamlongfung
YouTube : http://www.youtube.com/fungfungky
Website : http://www.funguitar.com.hk

Comments

comments